Sekretari amerikan i Shtetit, Antony Blinken ka uruar Shqipërinë për 111-vjeorin e Pavarësisë. Në një deklaratë të publikuar në faqen zyrtare të Departamentit Amerikan të Shtetit (DASH), Blinken shkruan se SHBA vlerëson bashkëpunimin me Shqipërinë si aleate.
Edhe njëherë, Blinken thekson angazhimin e SHBA për çuarjen përpara të reformës në drejtësi, teksa shpreh mbështetjen ndaj vendit tonë për integrimin e plotë në komunitetin euroatlantik.
“Në emër të Shteteve të Bashkuara të Amerikës, uroj qeverinë dhe popullin e Shqipërisë dhe ju uroj një festë të gëzuar për 111-vjetorin e Pavarësisë. Shtetet e Bashkuara janë krenare që punojnë me ju si aleatë dhe partnerë të NATO-s të angazhuar për të forcuar përpjekjet e Shqipërisë për reformën në drejtësi, për të çuar më tej bashkëpunimin tonë për sigurinë kibernetike dhe për të vazhduar mbështetjen tonë të palëkundur për Ukrainën përballë luftës së agresionit të Rusisë. Ne ju falënderojmë për mirëpritjen tuaj bujare dhe me zemër të hapur të afganëve dhe mbështesim fuqishëm integrimin tuaj të plotë në komunitetin euroatlantik, veçanërisht përmes përparimit në reformat e sundimit të ligjit dhe drejt anëtarësimit në Bashkimin Evropian”, shkruan Blinken.
Sipas Blinken, vendi ynë ka bërë përparim “të fuqishëm” në dekadat e fundit, ndërsa thekson se lidhja dhe miqësia mes dy vendeve mbetet e qëndrueshme.
“Zgjedhja e fundit e Shqipërisë në Këshillin e OKB-së për të Drejtat e Njeriut është një shenjë respekti ndërkombëtar për përparimin e fuqishëm që ka bërë kombi juaj në dekadat e fundit dhe një njohje e shërbimit të tij shembullor në 2015-2017. Ne jemi krenarë që shërbejmë përkrah Shqipërisë dhe presim me padurim të punojmë së bashku për të promovuar dhe mbrojtur të drejtat e njeriut në mbarë botën. Lidhjet midis kombeve tona, të bazuara në vlerat, kulturën dhe miqësinë e përbashkët mbeten të qëndrueshme. Le të vazhdojë të përparojë puna jonë së bashku”, përfundon deklaratën e tij Blinken.
