Aktivisti i opozitës ruse Leonid Volkov, i cili ka qenë ish-shefi i shtabit të liderit të ndjerë të opozitës ruse Alexey Navalny, u sulmua të martën jashtë shtëpisë së tij në kryeqytetin lituanez Vilnius, sipas zëdhënëses së Navalny, Kira Yarmysh.
“Leonid Volkov sapo është sulmuar jashtë shtëpisë së tij. Dikush theu xhamin e makinës dhe i hodhi gaz lotsjellës në sy, e më pas sulmuesi e goditi Leonidin me një çekiç,” tha Yarmysh në një postim në rrjetet sociale.
Ivan Zhdanov, drejtori i Fondacionit Kundër Korrupsionit të Navalny, tha se Volkov u sulmua “afër shtëpisë” dhe “ata i goditën këmbët me një çekiç si dhe i goditën krahët”.
Imazhet e shpërndara nga Zhdanov treguan Volkovin me një fytyrë të fryrë dhe një këmbë të gjakosur. Xhami i thyer dhe gjaku shihen pranë një makine në një foto tjetër. Volkov është dërguar në spital, tha Zhdanov në një postim në rrjetet sociale.
Autoritetet lituaneze po hetojnë sulmin e së martës, tha ministri i Jashtëm i vendit Gabrielius Landsbergis në një postim në X. “Autorët do të duhet të përgjigjen për krimin e tyre,” tha Landsbergis, duke e përshkruar sulmin si “tronditës”.
Sulmi vjen disa ditë përpara zgjedhjeve presidenciale të Rusisë, të parë si një ushtrim kushtetues ku presidenti Vladimir Putin është i sigurt se do të fitojë mandatin e pestë.
Volkov, i cili kishte shërbyer si kryetar i Fondacionit Kundër Korrupsionit të Navalny-t deri në vitin 2023, i hodhi poshtë zgjedhjet në shkurt duke i cilësuar si “cirk”, dhe tha në mediat sociale se ato kishin për qëllim të sinjalizonin mbështetjen dërrmuese masive të Putinit.
“Duhet të kuptoni se çfarë do të thotë ‘zgjedhjet’ e marsit për Putinin. Ato janë një përpjekje propagandistike për të përhapur mungesën e shpresës” në mesin e elektoratit, tha Volkov.
Figura e opozitës ka disa vite që jeton jashtë Rusisë për arsye sigurie. Ajo përballet me akuza të shumta të motivuara politikisht në Rusi.
