Ata të cilët kërkojnë siguri nga lufta dhe persekutimi janë të kërcënuar nga një mjedis politik armiqësor, deklaroi sot sekretari i përgjithshëm i OKB-së, Antonio Guterres duke përkujtuar përvjetorin e parë të paktit global të refugjatëve të Kombeve të Bashkuara.
“Në një kohë kur e drejta e azilit është nën sulm, kur refugjatëve u janë mbyllur kaq shumë dyer dhe kur arrestohen kaq shumë fëmijë refugjatë e ndahen nga familjet e tyre, duhet të ripohojmë të drejtat e tyre të njeriut”, deklaroi Guterres në Forumin Global të Refugjatëve.
Më shumë se 1 000 delegatë nga qeveritë dhe bizneset u mblodhën në qytetin zviceran për të diskutuar zbatimin e marrëveshjes “Kompakt Global për Refugjatët”, që u miratua vitin e kaluar nga anëtarët e OKB-së për të lehtësuar barrën për vendet pritëse, rritur pavarësinë e refugjatëve dhe krijuar shtigje të ligjshme të migracionit.
“Është koha për të hequr dorë nga një model mbështetjeje që shumë shpesh nënkupton vendosjen e jetës së refugjatëve në pritje për dekada të tëra, të kufizuar në kampe, të jetuarit dita ditës pa qenë në gjendje të lulëzojnë ose të japin një kontribut për shoqërinë”, deklaroi Guterres.
Sipas Agjencisë së Refugjatëve të OKB-së, ka aktualisht rreth 71 milion njerëz të shpërngulur në të gjithë botën, 25 milion prej tyre jetojnë si refugjatë jashtë vendit./ATSH/
