Kryeministri i Mbretërisë së Bashkuar Rishi Sunak është zotuar të rifusë shërbimin e detyrueshëm kombëtar nëse Partia Konservatore mbetet në pushtet pas zgjedhjeve të përgjithshme, të caktuara për në korrik, njoftuan mediat britanike të dielën.
Sipas skemës, e cila pritet të kushtojë rreth 2.5 miliardë £ në vit, të gjithë 18-vjeçarëve do t’u kërkohet të bashkohen me ushtrinë me kohë të plotë ose të jenë vullnetarë një fundjavë në muaj, me organizata të komunitetit si p.sh. policia ose Shërbimi Shëndetësor Kombëtar (NHS).
Sunak argumentoi se shërbimi i detyrueshëm do të ndihmonte në ringjalljen e “ndjenjës kombëtare” dhe “të ofronte mundësi për ndryshimin e jetës për të rinjtë”.
“Ky është një vend i mrekullueshëm, por breza të rinjsh nuk kanë pasur mundësitë apo përvojën që meritojnë dhe ka forca që përpiqen të ndajnë shoqërinë tonë në këtë botë gjithnjë e më të pasigurt,” shpjegoi Sunak, sipas BBC.
