Presidenti rus, Vladimir Putin, paralajmëroi Perëndimin se anëtarët e NATO-s po luanin me zjarrin duke propozuar lejimin e Ukrainës që të përdorë armë perëndimore për të goditur objektivat brenda Rusisë, gjë që ai tha se mund të shkaktojë një konflikt botëror.
Kur kanë kaluar më shumë se dy vjet nga konflikti më vdekjeprurës në Europë që nga Lufta e Dytë Botërore, Presidenti Putin ka folur gjithnjë e më shumë mbi rrezikun e një konflikti shumë më të gjerë global, ndërsa Perëndimi gjendet përballë pikëpyetjes se çfarë duhet bërë lidhur me përparimin e trupave ruse në Ukrainë.
Duke folur për anëtarët e NATO-s, Presidenti Putin tha se vendet e vogla në Europë “duhet të jenë të vetëdijshme se me çfarë po luajnë”, pasi ato kishin sipërfaqe të vogla tokësore me popullsi shumë të dendur.
“Ky është një faktor që ata duhet ta kenë parasysh përpara se të flasin për goditje në thellësi të territorit rus”, tha Presidenti Putin.
Fillimi i agresionit rus në Ukrainë, në vitin 2022, shkaktoi dëmtimin më të madh të marrëdhënieve mes Rusisë dhe Perëndimit në 60 vjet. Kriza po përshkallëzohet drejt asaj që diplomatët thonë se është faza më e rrezikshme deri më sot.
Pushtimi ka shkaktuar vdekjen e dhjetëra mijëra civilëve ukrainas, ka detyruar miliona të ikin jashtë vendit dhe ka kthyer në gërmadha qytete të tëra.
Rusia, e cila kontrollon 18% të Ukrainës, po përparon dhe ka hapur një front të ri në rajonin e Kharkiv, duke nxitur një debat në Perëndim se çfarë mund të bëjë më shumë pasi i ka dhënë Kievit ndihma ushtarake prej qindra miliarda dollarësh.
Udhëheqësit perëndimorë dhe Ukraina kanë minimizuar paralajmërimet e Rusisë për rrezikun e një lufte më të gjerë që përfshin Rusinë, fuqinë më të madhe bërthamore në botë, dhe NATO-n, aleancën më të fuqishme ushtarake në botë të udhëhequr nga Shtetet e Bashkuara.
