Objektivi i sulmit me armë zjarri në një lokal në Memaliaj rreth orës 11.20 të mbrëmjes së djeshme ishte biznesmeni 74 vjeçar Shyqo Kalemi por viktima të të shtënave me automatik ngelën edhe dy persona të tjerë Gledio Muka dhe Marsel Çela, kamarieri dhe një klient i lokalit 36 vjeç dhe 47 vjeç.
Vëllai i Shyqo Kalemit, Artur Kalem 57 vjeç ishin së bashku në një tavolinë dhe ka marrë plagë të rënda dhe gjendet në spitalin e Gjirokastrës në reanimacion.
Atentatorët që besohet se kanë mbërritur dhe janë larguar me një “BMW” kanë qëlluar me breshëri automatiku në drejtim të objektivit, Shyqo Kalemi i cili ndodhej i ulur në një tavolinë jashtë lokalit pranë bashkisë së Memaliajt.
Dyshohet që vrasja të ketë qenë një hakmarrje ndaj Andrea-Adriatik Kalemit, djalit të viktimës Shyqo Kalemi i dyshuar si i përfshirë në vrasjen e biznesmenit Edmond Papa në dhjetor të 2022. Papa po në vitin 2022 dyshohet se kishte urdhëruar eleminimin me eksploziv të Aleksandër Sadikaj kushëri i Adriatik Kalemit, edhe ai biznesmen në Memaliaj.
Policia është vënë në ndjekje të autorëve që besohet se janë identifikuar. Sipas njoftimit zyrtar në drejtim të Memaliajt janë nisur Forcat Speciale Renea, Forcat Kombëtare të Sigurisë si dhe drejtues të lartë të Drejtorisë së Përgjithshme të Policisë së Shtetit.
Autorët menjëherë pas ngjarjes janë larguar me shpejtësi në drejtim të Mallakastrës me një automjet të cilin e kanë djegur në fshatin Bejaj, Mallakastër.
Forcat Kombëtare të Sigurisë dhe Renea kanë shkuar në vendin ku po digjej automjeti, kanë rrethuar zonën dhe vijojnë kontrollin për kapjen e autorëve.
Policia gjithashtu ka ngritur postbllokë kontrollesh në të gjitha akset që mund të përdoreshin prej autorëve për tu larguar në bashkëpunim edhe me drejtoritë e policisë së qarqeve, Fier, Vlorë dhe Berat.
Dyshohet se autorët kanë qenë të paktën 3 persona, të cilët kanë ardhur me makinë të zezë nga qyteti i Memaliajt në drejtim të lokalit. Një prej tyre ka zbritur nga mjeti dhe ka qëlluar me breshëri në drejtim të Shyqyri Kalemit, i cili ishte ulur në një tavolinë jashtë lokalit.
Plumbat kapën dhe vëllanë e tij, si edhe kamarierin Gledian Muka që ishte pranë tavolinës. Ndërkohë, klienti, Marsel Çela që mbeti i vdekur, ka qenë brenda në lokal.
Pas atentatit, autorët janë larguar në drejtim të Mallakastrës, ku në fshatin Bejaj kanë djegur makinën me të cilën kryen atentatin.
