Presidentja e Komisionit Evropian, Ursula von der Leyen, nis sot nga Tirana udhëtimin katërditor në Ballkanin Perëndimor. Ajo do të takohet me liderët e Shqipërisë, Maqedonisë së Veriut, Bosnje-Hercegovinës, Serbisë, Kosovës dhe Malit të Zi.
“Ky do të jetë rasti për të diskutuar progresin e partnerëve tanë të Ballkanit Perëndimor në rrugën drejt BE-së, si dhe Planin e Rritjes prej 6 miliardë eurosh të BE-së”, thuhet në faqen zyrtare të Komisionit Europian.
Presidentja fillimisht do të vizitojë sot Tiranën, ku do të takohet me kryeministrin e Shqipërisë, Edi Rama. Ajo do të mbajë një fjalim edhe në ceremoninë e hapjes së vitit akademik të Kolegjit të Evropës në Tiranë. Të enjten në mëngjes ajo do të me presidentin Bajram Begaj.
Gjatë të gjitha vizitave të saj presidentja do të mbajë konferenca për shtyp. Me kryeministrin rama konferenca për shtyp është planifikuar në orën 16:10, kurse ceremonia e hapjes së Kolegjit të Europës do të jetë rreth orës 17:00.
Më pas do të udhëtojë për në Shkup, ku do të takohet me kryeministrin e Maqedonisë së Veriut, Hristijan Mickoski dhe me presidenten Gordana Siljanovska-Davkova.
Më vonë gjatë ditës, presidentja Von der Leyen do të udhëtojë në Jablanicë, në Bosnje-Hercegovinë, për të vizituar zonat e prekura nga përmbytjet që goditën së fundmi vendin. Të premten në mëngjes ajo do të jetë në Sarajevë ku do të takohet me Presidencën e Bosnje-Hercegovinës, si dhe me kryetaren e Këshillit të Ministrave, Borjana Krišto.
Më pas presidentja e KE-së do të udhëtojë në Beograd. Atje ajo do të takohet me presidentin e Serbisë, Aleksandar Vuçiç dhe kryeministrin, Millosh Vuçeviç.
Ndërsa të shtunën presidentja von der Leyen do të jetë në Prishtinë, ku do të takohet me presidenten e Kosovës, Vjosa Osmani dhe kryeministrin, Albin Kurti.
Udhëtimin e saj në rajon ajo do ta përmbyllë në Podgoricë, ku do të ketë takime me presidentin e Malit të Zi, Jakov Milatoviq dhe me kryeministrin, Milojko Spajiq.
Vizita e sivjetshme vjen pas asaj të vitit të kaluar dhe disa rasteve në të cilat Presidenti ka theksuar rëndësinë e rajonit për Bashkimin Evropian. Ajo e bëri këtë së fundmi, në Samitin e Procesit të Berlinit dhe Forumin Strategjik të Bled.
