Qindra fermerë britnaikë kanë bllokuar dje sheshin para parlamentit në protestë ndaj taksës më të fundit të qeverisë laburiste të Keir Starmer kundër fermerëve, që kërkon 20% taksë për të trashëguar fermën nga babai të i biri për fermat e mëdha familjare.
Kreu i sindikatës së fermerëve shpjegonte në protestë se pasojat e taksave të shtuara ndaj fermerëve britanikë kanë shkaktuar jo vetëm dëmtim të prodhimit por demoralizim dhe vetëvrasje mes tyre.
Tom Bradshaw tregonte i përlotur se fermerët nuk e kuptojnë logjikën e taksës 20 përqind të trashëgimisë ndaj aseteve bujqësore me vlerë mbi 1 milionë paundë. “Këto nuk janë para, por është puna e një jete dhe e brezave para tyre, trashëgimia dhe ruajtja e fermës”, tha ai.
Teksa ai fliste në intervistën me Independent, traktorët para parlamentit zhurmonin për herë të dytë në po aq muaj kundër planeve të qeverisë laburiste.
Traktorët më pas parakaluan në zyrat e parlamentit, si pjesë e ditës së veprimit të organizuar nga grupet ‘Save British Farming’ dhe ‘Kent Fairness for Farmers’.
Por kryeministri i ri Keir Starmer dukej i vendosur në politikat e tij duke thënë në një intervistë: “Në rastet më tipike pragu i taksimi është për fermat e mëdha, shumica nuk do të preken, megjithëse ka shumë dezinformacion”.
Drejtuesja e grupeve fermerë Victoria Vyvyan, gjithashtu foli në protestë duke argumentuar masat e njëpasnjëshme të qeverisë për të dëmtuar fermerët vendas.
“Ne e dimë atë që po ndodh, pretendimet tona nuk janë anekdota. Ata dërgojnë inspektorë shëndeti në fermat e Cornwall që shpikin probleme të të gjitha llojeve duke përfshirë ‘abuzim në familje, apo ‘fëmijë që nuk shkojnë në shkollë’, ky është një problem që shpesh shfaqet në shtytjen e fundit nga autoritetet”, tha Vivian për rrjetin vendas Sky News.
Tom Bradshaw bënte thirrje për taksa që fokusohen në pasurinë personale jo atë të biznesit pasi sipas tij “kjo sjell propozime shumë ndryshe nga ato që paraqiten në tavolinë”.
Mes protestuesve ishte një grua e re që trembej se familja e saj do të humbiste fermën prej taksës së trashëgimisë.
26 vjeçarja Claire Fifield, jeton në Londër por viziton shpesh fermën e familjes Buckinghamshire për të ndihmuar.
Ata janë fermerë qiraxhinj por sërish taksa bën që prindërit e saj të mos jenë të aftë t’i lënë fermën fëmijëve të tyre dhe gjeneratave të ardhshme.
Ajo tha: “Qeveria nuk e ka idenë për fermerët qiraxhinj, ata nuk kanë folur me asnjë fermer për vlerësimet që japin, por ndoshta vetëm kanë parë Jeremy Clarkson dhe thonë ‘Le të shkojmë t’ia marrim paratë, nenje kohe kur janë duke dënuar ata që kanë punuar si fermerë në këto toka prej gjeneratash”, shkruan rrjeti vendas The Independent.
