Partia Demokratike ka prezantuar mesditën e sotme koalicionin: “Aleanca për Shqipërinë Madhështore” (PD-ASHM). Në fjalën e tij gjatë prezantimit kreu demokrat Sali Berisha e ka cilësuar këtë koalicion të transparencës që përfaqëson elitën politike të kombit shqiptar. Sipas tij në të qëndrestarë të pamposhtur, personalitete, patriotë e ekspertë të shquar e shkolluar me synimin për ta bërë Shqipërinë të jetueshme.
“Së bashku me koalicionin më të fuqishëm që Shqipëria ka përjetuar në 32 vite u drejtohem shqiptarëve në një moment historik, moment të cilin ky komb vendos në përpjekjen më epike për t’u ndarë nga diktatura e dytë që kombi përjetoi 34 vite pas përmbysjes së diktaturës së parë. Kjo ditë është një ditë shumë e veçantë në historinë e shqiptarëve për liri e dinjitet, për një Shqipëri të jetueshme, për një Shqipëri Made In Albania. Ky koalicion që paraqitet sot para shqiptarëve përfaqëson jo vetëm shumicën absolute në distancë të qytetarëve shqiptarë, por përfaqëson elitën politike dhe të gjithanshme të kombit shqiptar. Ky koalicion ka në gjirin e vet vajza dhe djem burra dhe gra, qëndrestarë të pamposhtur, personalitete, patriotë e ekspertë të shquar e shkolluar. Ky koalicion ka të gjithë mendjen, vullnetin, atdhetarinë dhe përkushtimin për të bërë Shqipërinë madhështore. Për ta bërë Shqipërinë një vend ku qytetarët e lirë të saj të mos njohin më dhimbjet çnjerëzore të varfërisë ekstreme, ku bijtë të rendin pas ëndrrës shqiptare ta ndërtojnë në Shqipëri. Ky është koalicioni i transparencës, që njohin vlerësojnë shqiptarët, përfaqëson të gjithë interesat, shtresat, komunitetet e ndryshme të këtij kombi”, tha Berisha.
Berisha theksoi se ky koalicion nis garën përballë narkoregjimit, por me një epërsi të jashtëzakonshme morale.
“Ky koalicion i PD-së me aleancën për Shqipërinë madhështore është pritur me gëzim me interes të madh nga mbarë shqiptarët. Ky koalicion nis garën elektorale përballë një narkoregjimi i lidhur kokë e këmbë, kokë e xhep me krimin e korrupsionin. Ky koalicion nis garën me një epërsi të jashtëzakonshme morale”, deklaroi kreu demokrat.
Sipas Berishës ky vit do të jetë viti i diasporës.
“Prej dy muajsh PD dhe aleatët kanë bërë fushatën elektorale më të suksesshëm në historinë e tyre jashtë vendit. Angazhimi i PD dhe aleatëve në fushatë elektorale ka ndezur zemrat e shpresat e tyre ka provuar entuziazëm e vendosmëri të para nga vite ‘90 e sot. Viti 2025 do të quhet viti e diasporës”.
