Mijëra njerëz në Mbretërinë e Bashkuar janë arrestuar dhe marrë në pyetje nga policia për postime në internet që konsiderohen kërcënuese ose fyese, ka raportuar The Times, duke cituar të dhënat e paraburgimit.
Sipas shifrave të publikuara të premten, oficerët kryejnë rreth 12,000 arrestime çdo vit sipas nenit 127 të Aktit të Komunikimeve 2003. Këto ligje kriminalizojnë shkaktimin e shqetësimit përmes mesazheve që janë “shumë fyese” ose që shërndajnë përmbajtje “të turpshme” në rrjetet sociale, shkruan Rt.
Vetëm në vitin 2023, oficerë nga 37 forca policie bënë 12,183 arrestime, rreth 33 në ditë. The Times tha se kjo shënon një rritje prej 58% nga viti 2019, kur u regjistruan 7,734 arrestime.
Në të njëjtën kohë, të dhënat e qeverisë tregojnë se dënimet kanë rënë me gati gjysmën. Statistikat kanë ngjallur protesta publike, me grupet e lirive civile që akuzojnë autoritetet për mbipolicim të internetit dhe minim të fjalës së lirë përmes përdorimit të ligjeve të “paqarta” të komunikimit.
The Times theksoi rastin e Maxie Allen dhe Rosalind Levine, të cilët u arrestuan më 29 janar pasi ngritën shqetësime në një grup privat të prindërve WhatsApp për procesin e punësimit të shkollës së vajzës së tyre. Gjashtë oficerë me uniformë mbërritën në shtëpinë e tyre, i ndaluan në sy të fëmijës së tyre më të vogël dhe i çuan në një stacion policie.
Çifti u mor në pyetje me dyshimin për ngacmim, komunikim keqdashës dhe shqetësim në pronën e shkollës. Atyre iu morën shenjat e gishtave, u kontrolluan dhe u mbyllën në një qeli për tetë orë.
“Ishte e vështirë të largohesha nga ndjenja se po jetoja në një shtet policor”, tha Allen për Daily Mail, duke shtuar se mesazhet nuk përmbanin “asnjë gjuhë fyese apo kërcënim”, por ishin thjesht “pak sarkastike”.
