Mbretëria e Bashkuar po planifikon një rritje të ndjeshme të kapaciteteve të saj për prodhimin e eksplozivëve, me qëllim që të reduktojë varësinë nga aleatët si SHBA-ja dhe Franca për furnizimin me municione, raporton The Times.
Sipas burimeve, kontejnerë të specializuar transporti do të vendosen në pika të ndryshme në gjithë territorin britanik për të prodhuar eksplozivë RDX – një komponent kyç në municionet 155 mm të përdorura nga artileria e Ushtrisë Britanike dhe sisteme të tjera të avancuara.
Kompania e njohur e mbrojtjes, BAE Systems, është duke shqyrtuar ndërtimin e tre objekteve të reja prodhimi për të rritur qëndrueshmërinë e zinxhirit të furnizimit, duke shtuar mbrojtjen ndaj rreziqeve të mundshme në rast sulmesh ndaj infrastrukturës ekzistuese.
Sekretari i Mbrojtjes, John Healey, e përshkroi këtë hap si vendimtar në kuadër të forcimit të kapaciteteve vendore të mbrojtjes.
“Forcimi i prodhimit të artilerisë në vend është një hap i rëndësishëm për të mësuar mësimet nga Ukraina, duke rritur qëndrueshmërinë tonë industriale dhe duke e bërë mbrojtjen një motor për rritje,” deklaroi ai.
Healey theksoi gjithashtu se industria e mbrojtjes mbetet “themeli i aftësisë sonë për të luftuar dhe fituar në fushën e betejës”, në një kontekst global të rritjes së tensioneve dhe kërkesës për municione.
