Ish-piloti i Formula 1, Mick Schumacher, është ndarë nga partnerja e tij, Laila Hasanovich, pas një lidhjeje që zgjati rreth dy vite.
Lajmi është raportuar nga media gjermane Bild, ndërsa ndarja duket se është konfirmuar edhe nga aktiviteti i tyre në rrjetet sociale.
26-vjeçari, i cili aktualisht garon në Kampionatin Botëror të Qëndrueshmërisë FIA me ekipin Alpine, ka hequr së fundmi të gjitha fotografitë me modelen daneze nga llogaria e tij në Instagram.
Ndërkohë, të dy janë parë aktivë në aplikacionin ekskluziv të takimeve “Raya”, i cili përdoret nga të famshëm dhe personazhe publikë.
Hasanovich, 24 vjeçe, është një modele me bazë në Kopenhagë dhe ka qenë finaliste në Miss Universe Denmark 2019.
Ajo ka një ndjekje të konsiderueshme në Instagram, me mbi 343 mijë ndjekës. Laila ishte gjithashtu e vetmja partnere e Mick që kishte vizituar babanë e tij, legjendën e Formula 1, Michael Schumacher, që ndodhet në një gjendje të rëndë shëndetësore që nga aksidenti i tij me ski në vitin 2013.
Michael Schumacher, i cili pësoi dëmtime të rënda në tru pas një aksidenti në Meribel, Francë, nuk është parë më në publik që prej asaj kohe.
Familja ka mbajtur një jetë shumë private, me gruan e tij, Corinna, që ka krijuar një rreth të ngushtë personash që kanë qasje tek ai, përfshirë ish-pilotin Felipe Massa, mikun Luca Badoer dhe menaxheren e tij Sabine Kehm.
Në një intervistë të fundit, Massa foli shkurtimisht për një vizitë që i kishte bërë ish-shokut të tij të skuadrës, duke thënë:
“E pashë atë. Por gjithmonë duhet të respektojmë vendimin e Corinnës. Schumacher ishte gjithmonë shumë i rezervuar për familjen. Edhe kur ishte në garë, fëmijët e tij dilnin në pistë vetëm kur fillonte gara, për të mos pasur vëmendje mediatike.”
Ndërkohë, karriera e Mick Schumacher mbetet në zhvillim. Pas garimit me Haas në Formula 1 në sezonet 2021 dhe 2022, ai ka shërbyer si pilot rezervë për Mercedes gjatë viteve 2023 dhe 2024, ndërsa kërkon të rikthehet në skenën kryesore të F1.
