Numërimi i votave në Shqipëri po shkon drejt fundit. Sipas të dhënave të KQZ-së kanë mbetur 2,985 zarfe të ardhura nga diaspora për t’u hapur.
Ndërkohë gara më e fortë është brenda “shtëpisë” e sidomos brenda Partisë Socialiste.
Në Tiranë, aty ku është mbyllur numërimi i votave për kandidatët, ish-ministrja Olta Xhaçka ka mundur të fitojë vetëm me 2 vota më shumë. Sipas të dhënave në KQZ-së, ajo ka mundur kolegen e saj socialiste Blerina Gjylameti, duke “i rrëmbyer” karrigen në legjislaturën e ardhshme.
Olta Xhaçka ka marrë 5806 vota ndërsa Gjylameti 5804.
Garë e fortë edhe mes Ornaldo Rakipit dhe Xhemal Qefalisë. Shpesh gjatë numërimit ata bënë “rrokada”, herë duke dalë herë njëri para e herë tjetri, por duket se votat e diasporës konsoliduan pozitat e Rakipit.
Ky i fundit mori 189 vota më shumë se deputeti veteran i Partisë Socialiste.
