Mbreti Charles ka udhëtuar drejt Kanadasë për një vizitë që synon të tregojë mbështetjen e tij ndaj vendit që e njeh si kreun e shtetit, ndërkohë që Kanadaja ndodhet nën presionin e presidentit amerikan Donald Trump, i cili ka shprehur dëshirën për ta bashkuar atë me Shtetet e Bashkuara si shteti i 51-të.
Me ftesë të kryeministrit të sapozgjedhur të Kanadasë, Mark Karni, Mbreti Charles do të marrë pjesë të martën, në hapjen zyrtare të sesionit të ri parlamentar në Otavë, ku do të mbajë fjalimin tradicional të hapjes, një akt që nuk është bërë nga asnjë monark britanik që prej 68 vitesh, që kur e kishte bërë për herë të fundit nëna e tij, Mbretëresha Elizabeta.
Monarku 76-vjeçar, i cili ndodhet ende nën trajtim për kancer, ka reduktuar angazhimet zyrtare, dhe kjo vizitë dyditore nënvizon përkushtimin e tij ndaj Kanadasë, një prej vendeve të Commonwealth-it ku ai mban pozitën e kryetarit të shtetit.
Ndërkohë, Donald Trump ka shprehur disa herë dëshirën për të aneksuar Kanadanë, ide të cilës i është kundërvënë fuqishëm kryeministri Karni.
“Kanadaja nuk është në shitje dhe nuk do të jetë kurrë,” deklaroi javën e kaluar ambasadori kanadez në Mbretërinë e Bashkuar, Ralph Goodale. “Mbreti, si kreu i shtetit, do të përforcojë qartë këtë mesazh,” shtoi ai.
Në muajt e fundit, Mbreti Charles ka treguar publikisht mbështetjen e tij për Kanadanë, duke mbajtur medalje kanadeze, duke e quajtur veten “mbret i Kanadasë” dhe flamurin kanadez “një simbol krenarie dhe admirimi që nuk shuhet kurrë”.
Megjithatë, ai përballet me një situatë të ndjeshme politike, pasi kryeministri i Mbretërisë së Bashkuar, Kir Starmer, po përpiqet të ruajë marrëdhënie të qëndrueshme me Trump-in, sidomos për çështje si lufta në Ukrainë dhe marrëdhëniet tregtare.
Gjatë vizitës së tij në Shtëpinë e Bardhë në shkurt, Starmer e përmendi ftesën e Mbretit për një vizitë të dytë zyrtare të Trump-it në Britani, një veprim që vetë presidenti amerikan e ka vlerësuar, pasi ka lavdëruar shpesh familjen mbretërore britanike.
Megjithatë, ky gjest ka shkaktuar pakënaqësi në Kanada, sipas kryeministrit Karni.
Vizita e Mbretit Charles dhe Mbretëreshës Kamila është e para në ish-koloninë britanike që prej shtatorit 2022, kur ai mori fronin. Sot, çifti mbretëror do të vizitojë një park të madh në Otavë dhe do të takojë shitës ambulantë dhe artistë, sipas njoftimit të Pallatit të Buckinghamit.
Më pas, Mbreti do të japë simbolikisht sinjalin për nisjen e një ndeshjeje hokeji dhe do të mbjellë një pemë në një pjesë tjetër të qytetit.
Kjo do të jetë hera e tretë në histori që një monark mban “Fjalimin nga Froni” në Senatin kanadez, me të cilin shpallet hapja e punimeve të parlamentit.
Karl dhe Kamila do të mbërrijnë në Senat me karrocë mbretërore dhe të shoqëruar nga 28 kalorës.
