Ombrella bërthamore franko-britanike e vendosur në mbrojtje të Europës: është rezultati më i rëndësishëm i samitit të Londrës mes Keir Starmer dhe Emmanuel Macron, një marrëveshje e cilësuar nga kryeministri laburist si “një moment historik për botën”. “Ne jemi dy kombet bërthamore në Europë — tha Starmer në konferencën për shtyp — dhe kemi rënë dakord të bëjmë një hap të jashtëzakonshëm përpara sa i përket mënyrës se si koordinojmë kapacitetet tona në mbështetje të Europës dhe NATO-s”.
Macron: “Çdo kërcënim ekstrem do të marrë një përgjigje të shpejtë”
Siç shpjegoi Macron, Britania e Madhe dhe Franca kanë ndryshuar doktrinën e tyre bërthamore dhe që tani e tutje çdo “kërcënim ekstrem ndaj Europës” do të përballet me “përgjigjen e shpejtë” të të dyja kombeve: “Një mesazh që partnerët tanë, ashtu si edhe kundërshtarët, duhet ta dëgjojnë”, theksoi presidenti francez. Dy mjetet kombëtare bërthamore mbeten të pavarura, por do të “koordinohen” nga tani e tutje.
Qëndrimi i paqartë i Trump mbi nenin 5 të NATO-s
Në praktikë, Londra dhe Parisi marrin përsipër përgjegjësinë për mbrojtjen e Europës përballë paqartësive të Amerikës së Donald Trump, i cili ka shkuar deri në vënien në dyshim të besnikërisë së tij ndaj Nenit 5 të NATO-s, ai që parashikon një reagim kolektiv në rast agresioni ndaj një shteti anëtar: tashmë për këtë angazhim përgjegjësinë e marrin direkt britanikët dhe francezët sepse, siç tha Macron, të dyja vendet ndajnë një “përgjegjësi të veçantë” për sigurinë e Kontinentit, si të vetmet fuqi bërthamore me forca të armatosura të besueshme. Mbrojtja e përbashkët europiane do të garantohet edhe në planin konvencional, përmes ndërtimit të përbashkët të raketave anti-anije të gjeneratës së re dhe një sërë armësh të avancuara, përfshirë ato të bazuara në inteligjencën artificiale.
Dhe sidomos përmes zgjerimit deri në 50 mijë trupa të forcës së reagimit të shpejtë franko-britanike, e cila po riorientohet drejt mbrojtjes së Europës dhe bëhet “gati për luftim”. Ajo mund të shërbejë, sipas Elizesë, si “bërthama për të planifikuar forcat e garantimit që mund të vendosen në Ukrainë si pjesë e një armëpushimi të ardhshëm”.
Mbledhja virtuale nga Londra e të Vullnetshmëve
Nga Londra, Starmer dhe Macron kryesuan dje një mbledhje të re virtuale të “koalicionit të të Vullnetshmëve”, ku morën pjesë kancelari gjerman Friedrich Merz, kryeministrja italiane Giorgia Meloni dhe për herë të parë edhe Shtetet e Bashkuara me të dërguarin special të Trump, Keith Kellogg. Një debutim i theksuar me kënaqësi nga kryeministrja: “Besoj se është një sinjal i unitetit me të cilin duhet të punojmë për t’i rikthyer Ukrainës paqen dhe mirëqenien që meriton”.
Megjithatë, përballë hezitimit amerikan për t’u angazhuar për një garanci sigurie ndaj një kontingjenti të mundshëm paqeje që mund të dërgohet në Ukrainë, koalicioni është riorientuar drejt përpjekjes për të vendosur Kievin në pozitën më të mirë të mundshme në prag të një armëpushimi: pra, përmes stërvitjes dhe pajisjes së forcave të armatosura ukrainase, patrullimit të qiellit bashkë me aviacionin e tyre dhe forcimit të misionit tashmë ekzistues për sigurinë në Detin e Zi. “Duhet të riorientojmë përpjekjet tona drejt paqes, duke e detyruar Putinin të ulet në tryezën e negociatave. Ky presion i koordinuar do të bëjë diferencën”, tha Starmer. Ai dhe Macron theksuan se është hyrë në fazën operacionale, me një seli të koalicionit të instaluar në Paris.
Diplomacia
Në planin diplomatik, sekretari amerikan i Shtetit, Marco Rubio, bëri të ditur se ministri i Jashtëm rus, Sergei Lavrov, ka ndarë një “ide të re” për Ukrainën gjatë takimit të tyre në Malajzi: “Nuk është një qasje e re, është një ide apo koncept i ri që do t’ia paraqes presidentit për ta diskutuar”, tha Rubio, duke vënë në dukje se nuk është diçka që “sjell automatikisht paqen, por mund të hapë potencialisht rrugën për një zgjidhje”./Corriere della sera
