Cardi B nuk ka pranuar se ka sulmuar një roje sigurie, e cila po e akuzon për këtë.
Emani Ellis pretendon se reperja amerikane i çau faqen me thonjtë e saj 7,5 centimetër të gjatë dhe e pështyu pas një konflikti mes tyre jashtë një klinike gjinekologjike në vitin 2018 në Los Anxheles, e cila “e traumatizoi fort”.
Gjatë dëshmisë në gjykatë, Cardi tha se Ellis e kishte filmuar dhe ndjekur kundër dëshirës së saj kur ajo kishte shkuar për t’u vizituar ndërkohë që shtatzëninë nuk e kishte bërë ende publike.
Këngëtarja tha se debatoi me Ellis, por mohoi që ta kishte sulmuar. “Nuk e preka. Ishte zënkë verbale, por nuk kaloi në fizike”, tha ajo. Më tej shtoi se kur doli nga ashensori, Ellis, e cila punonte si roje sigurie, i tha dikujt në celular se ajo ishte aty dhe më pas e ndoqi në korridor.
Cardi B vijoi duke thënë se Ellis po e xhironte me celular, i cenoi privatësinë dhe refuzoi të “tërhiqej”, para se të ndodhte “konflikti verbal”.
Ajo pranoi se e kishte fyer Ellis dhe i kishte thënë “t’i hiqej sysh”, duke shtuar: “Po i bërtisnim njëra-tjetrës.”
Avokati mbrojtës theksoi se këngëtarja “kishte frikë për fëmijën në bark” dhe e akuzoi Ellis se “kishte ndryshuar dëshminë”.
Kjo e fundit kishte thënë më parë se e kishte thirrur emrin e Cardi nga entuziazmi kur e kishte parë, por nuk i kishte thënë askujt se ajo ishte aty dhe as nuk e kishte filmuar. Ajo shtoi se reperja e akuzonte se ishte përpjekur të përhapte lajmin që ishte te mjeku, më pas i hodhi ofendime e fyerje dhe e sulmoi.
Një kirurg plastik dëshmoi se e kishte mjekuar Ellis për një shenjë “shumë të ndjeshme” në faqe, “me gjasë” të shkaktuar nga thonjtë, sipas ekzaminimit të parë të kryer në vitin 2022.
Ellis e paditi Cardi në vitin 2020 për sulm dhe shkaktim të qëllimshëm të stresit emocional, neglizhencë dhe burgim të rremë.
