Një fushatë e financuar nga Qeveria britanike në rrjetet sociale, me qëllim që të dekurajonte emigrantët shqiptarë të emigronin ilegalisht drejt Britanisë, është ndërprerë pas shqetësimeve mbi efektivitetin e saj.
Video me emigrantë shqiptarë që flisnin për vështirësitë e jetesës në Britani u publikuan në Instagram, Facebook dhe TikTok, në një fushatë që nisi në vitin 2023 nën qeverinë konservatore. Me titullin “Histori nga Britania”, videot e paraqisnin vendin si paragjykues dhe e cilësonin Brexit-in si një vendim të gabuar.
Edhe pse Qeveria nuk e ka bërë publike koston e projektit, ai u financua nga Ministria e Jashtme si pjesë e një fushate vjetore prej 3.75 milionë paundësh për të luftuar “migracionin e parregullt shqiptar”.
Megjithatë, gazeta ‘The i Paper’ më herët kishte zbuluar se një raport i Ministrisë së Jashtme kishte vënë në pikëpyetje suksesin e mundshëm të kësaj fushate, me një dokument të brendshëm që shprehej se kishte “prova të kufizuara për efektivitetin e një qasjeje dekurajuese përmes komunikimit”.
Qeveria është përballur me kritika të forta për këtë fushatë, e cilësuar si një “dështim i kushtueshëm” që shpërdoroi paratë e taksapaguesve dhe e denigroi imazhin e Britanisë.
Tani, Qeveria ka konfirmuar se fushata ka përfunduar, por thekson se “lufta kundër migracionit të parregullt dhe mbrojtja e kufijve të Britanisë” mbetet një prioritet.
Fushata që paraqiti Britaninë në dritë të keqe
Fushata përdorte postime në rrjetet sociale për të portretizuar një imazh negativ të Britanisë, me fotografi bardhë e zi që tregonin dyqane të mbyllura me grafite, banesa të amortizuara dhe mobilie të dëmtuara të hedhura pranë lagjeve të banuara.
Videot nënvizonin krizën e kostos së jetesës, gjendjen e keqe të banesave dhe vështirësitë për të gjetur punë.
Fushata erdhi pas një rritjeje të madhe të emigracionit të paligjshëm nga Shqipëria në vitin 2022, me shumë persona që udhëtonin me gomone për të hyrë në Britani. Që atëherë, numrat kanë rënë ndjeshëm – pjesërisht falë një skeme për të kthyer në Shqipëri ata që nuk kanë të drejtë qëndrimi – por qindra vetë vazhdojnë të udhëtojnë drejt Mbretërisë së Bashkuar.
Në një nga videot, një emigrant shqiptar deklaron se Brexit-i dhe kriza e kostos së jetesës e kanë bërë jetën e tij më të vështirë:
“Erdha këtu me vizë. Ka pasur shumë ndryshime, sidomos në 8 vitet e fundit për shkak të Brexit-it dhe pandemisë. Shumë gjëra kanë ndryshuar, dhe kostoja e jetesës është bërë shumë e lartë.”
Në një tjetër video, një e diplomuar ankohet se ka pasur vështirësi për të hyrë në industrinë e saj të preferuar dhe ka përjetuar diskriminim në Britani.
“Shpërdorim parash për spektakël mediatik”
Vendimi për ta ndërprerë fushatën – e cila ishte realizuar nga një kompani konsulence ndërkombëtare e bazuar në Westminster – nuk e habiti Daniel Sohege, drejtor i organizatës për të drejtat e njeriut Stand for All, i cili deklaroi:
“Nuk është hera e parë që zbatohet një politikë e tillë, dhe çdo herë është vërtetuar si e paefektshme dhe e kotë.
Njerëzit nuk e zgjedhin vendin ku kërkojnë azil sikur të ishte një ofertë turistike online.
Në rastin e shqiptarëve, shumë prej tyre trafikohen në vend pa pasur mundësi të zgjedhin vetë, duke u shfrytëzuar nga persona të tjerë.
Qeveria do të bënte më mirë të mbështeste këta njerëz dhe komunitetet e tyre, në vend që të shpenzojë para për spektakle PR-i që vetëm kërkojnë të kapin titujt e gazetave.”
Reagime lokale në Norwich
Videot u pritën me reagime të ashpra edhe në qytetin Norwich, ku u përdorën pamje për të përshkruar gjendjen e keqe në Britani.
Deputeti laburist lokal, Clive Lewis, u shpreh: “Kam thënë vazhdimisht se dua që emigracioni të menaxhohet në mënyrë të drejtë, kompetente dhe profesionale. Kjo fushatë nuk përmbush asnjërin prej këtyre kritereve dhe nuk më pëlqen që dikush të njollosë qytetin tonë. Ky lloj spektakli rrezikon të largojë shumë njerëz të nevojshëm nga jashtë, që ne i mirëpresim për të studiuar, për të mbushur vendet bosh në tregun e punës dhe për të mbajtur sistemin shëndetësor e social në funksion.”
Deklarata e Qeverisë
Qeveria tha: “Kjo fushatë tani ka përfunduar dhe llogaria nuk është drejtuar nga Qeveria britanike. Opinionet e shprehura ishin të individëve nga diaspora shqiptare dhe atyre që janë kthyer në Shqipëri. Lufta kundër migracionit të parregullt dhe mbrojtja e kufijve të Britanisë është një përparësi për këtë Qeveri.”
