Presidenti i SHBA-së, Donald Trump, ka njoftuar se do të presë samitin e G20 në vitin 2026 në një kompleks që përfshin një fushë golfi, pjesë e pronës së tij familjare.
“Nuk do të fitojmë para nga kjo”, tha ai, duke vënë në dukje se “objekti, Trump National Doral Miami, në Florida, është më i miri për samitin”.
Vitin tjetër, samiti do të jetë “vërtet madhështor”, u tha presidenti amerikan gazetarëve nga Zyra Ovale e Shtëpisë së Bardhë, duke theksuar se kompleksi i tij është pranë aeroportit dhe duke shtuar se “çdo vend do të ketë ndërtesën e vet”.
Trump deklaroi gjithashtu se do të donte që si Presidenti rus Vladimir Putin ashtu edhe Presidenti kinez Xi Jinping të merrnin pjesë në samitin e vitit 2026.
Në të njëjtën kohë, Trump konfirmoi se nuk do të marrë pjesë në samitin e ardhshëm të G20-ës, i cili do të mbahet në Afrikën e Jugut në nëntor, duke sqaruar se SHBA-të do të përfaqësohen nga zëvendëspresidenti i tij J.D. Vance.
G20 përfshin 19 vende anëtare, Bashkimin Evropian dhe Bashkimin Afrikan.
Një datë për ngjarjen nuk është konfirmuar ende.
