Ryanair ka njoftuar se do të shkurtojë edhe 1 milion vende të tjera nga fluturimet drejt Spanjës në verën e vitit 2026, duke e çuar totalin e reduktimeve në mbi 3 milionë vende për sezonet verë 2025 – dimër 2026.
Kompania fajëson rritjen me 6.5 për qind të tarifave aeroportuale nga operatori spanjoll Aena, duke e quajtur këtë vendim të papërgjegjshëm dhe të dëmshëm për turizmin rajonal.
CEO i Ryanair, Michael O’Leary, paralajmëroi se linja do të zhvendosë fluturimet drejt tregjeve më mikpritëse dhe me kosto më të ulëta, duke përmendur si alternativa Italinë, Marokun, Kroacinë dhe Shqipërinë.
“Ne do të vazhdojmë të operojmë në tregje ku kostot janë të arsyeshme. Nëse tarifat mbeten të larta, do ta rregullojmë orarin tonë në përputhje me rrethanat”, u shpreh O’Leary.
Në këtë sfond, Shqipëria paraqitet si një nga destinacionet me potencial për të thithur kapacitetet që Ryanair po tërheq nga Spanja.
Me kosto operacionale më të ulëta, rritje të vazhdueshme turistike dhe infrastrukturë aeroportuale në zgjerim, vendi ynë ofron atë që Ryanair kërkon: treg të ri, çmime konkurruese dhe rritje të shpejtë.
Aktualisht, Ryanair operon fluturime sezonale dhe të përvitshme nga Tirana drejt disa qyteteve evropiane, ndërsa aeroporti i Vlorës – i parashikuar të hapet në vitin 2026 – mund të jetë magnet për zgjerim të mëtejshëm.
