Në konferencën e përbashkët për mediat në Londër, Donald Trump dhe Keir Starmer, u fokusuan te temat që i bashkojnë vendet e tyre, por nuk munguan edhe dallimet, veçanërisht në lidhje me çështjen palestineze.
Starmer pranoi se ka pasur një mosmarrëveshje me Trump gjatë diskutimeve, edhe pse “janë plotësisht dakord për nevojën për paqe dhe një plan konkret për të ardhmen, pasi situata në Gaza është e padurueshme”.
Trump, nga ana tjetër kujtoi 7 Tetorin si “një nga ditët më të dhunshme në historinë e njerëzimit” dhe theksoi mosdakordësinë e tij me Starmerin për çështjen e njohjes së shtetit palestinez.
“Është një nga të paktat mospajtime që kemi, në të vërtetë,” tha presidenti amerikan.
Kujtojmë se Starmer ka deklaruar më herët se Britania do të njoh shumë shpejt shtetin e Palestinës.
Gjatë konferncës ai u pyet nga gazetarët mbi këtë vendim, ku një prej gazetarëvë iu drejtua duke i thënë se “pse po pret që presidenti amerikan Donald Trump të largohet nga vendi për të njohur zyrtarisht shtetin palestinez, dhe nëse një veprim i tillë do të rrezikonte të interpretohej si “shpërblim për Hamasin”.
“Hamas është një organizatë terroriste, e cila nuk mund të ketë asnjë rol në qeverisjen e ardhshme të Palestinës”, u përgjigj Starmer.
Kryeministri britanik vijoi duke thënë se Hamas nuk dëshiron zgjidhje me dy shtete, nuk kërkon paqe dhe nuk është i interesuar për një armëpushim në Gaza.
Ai sqaroi gjithashtu se kohëzgjatja apo momenti i njohjes së shtetit palestinez nuk ka asnjë lidhje me vizitën shtetërore të Trump në Mbretërinë e Bashkuar.
“Si unë, ashtu edhe presidenti Trump jemi të përkushtuar të punojmë për një zgjidhje më të mirë, në mënyrën më të mirë që mundemi,” përfundoi Starmer.
