Në një komunikim me gazetarët, kryetari i Partisë Demokratike, Sali Berisha dhe deputeti Xhelal Mziu deklaruan të premten se shpërthimi me tritol në banesën e këtij të fundit ishte një “akt terrorist” me prapavijë politike.
“Nuk kam asnjë lloj konflikti me asnjë person, gjatë karrierës time, nuk kam asnjë borxh ndaj askujt. Unë e shoh këtë një akt absolutisht politik dhe është një sinjal për të treguar se, nuk mund të sillesh apo reagosh ndaj kësaj qeverie krimi dhe korrupsioni,” u shpreh deputeti Mziu.
“Ky akt vjen pas qëndrimit të djeshëm antikushtetues të kreut të organizatës kriminale ndaj parlamentit dhe opozitës. Ky akt ka vetëm një synim, të mbyllë gojën e opozitarëve. Për të gjitha këto, e garantoj Edi Ramën se do mbajë përgjegjësi maksimale,” theksoi Berisha.
Si Berisha, ashtu edhe Mziu u shprehën skeptikë se uniformat blu do të mund të zbardhin këtë ngjarje të rëndë, pasi një pjesë e bluve, sipas tyre, është tërësisht në funksion të qeverisë.
