Konstituohet Kuvendi i Kosovës, ku këtë të premte ka zgjedhur Nenad Rashiqin si nënkryetar nga radhët e komunitetit serb, duke përmbyllur kështu një ngërç institucional që kishte zgjatur për 8 muaj.
Rashiq ishte kandidati i vetëm i mbetur në garë, pasi në votimet e mëparshme asnjëri nga nëntë kandidatët e Listës Serbe nuk arriti të marrë mbështetjen e nevojshme nga deputetët. Kandidatët që nuk kaluan votimin përfshijnë deputetët Igor Simiq, Srdjan Popoviq, Stefan Kovaçeviq, Branislav Nikoliq, Miljana Nikoliq, Verica Çeraniq, Ljiljana Stefanoviq, Zlatan Elek dhe Slavko Simiq.
Kryetari i Kuvendit, Dimal Basha, sqaroi se nuk kishte nevojë të hidhej shorti për zgjedhje, pasi Rashiq mbeti kandidati i vetëm nga komuniteti serb dhe, sipas rregullores, ai do të votohej nga Kuvendi.
Rashiq nuk u propozua nga Lista Serbe, e cila vazhdimisht ka kundërshtuar përfaqësimin e tij si pjesë e komunitetit serb në institucione. Megjithatë, në mungesë të një kandidature tjetër të pranuar nga Kuvendi, ai u përfshi në votim dhe u zgjodh.
Deputeti serb, Nenad Rashiq, është futur si kandidat për nënkryetar të Kuvendit pa propozim direkt nga përfaqësuesi i komitetit serb.
Rashiqi mori 71 vota pro, 9 kundër, dhe 24 abstenime. Pro tij votuan deputetët e Lëvizjes Vetëvendosje dhe Lidhjes Demokratike të Kosovës. Ndërkohë, deputetët e Partisë Demokratike të Kosovës dhe Aleancës për Ardhmërinë e Kosovës abstenuan, ndërsa Lista Serbe votoi kundër zgjedhjes së tij.
Deputetja e Lidhjes Demokratike të Kosovës, Hykmete Bajrami, tha se votimi për Nenad Rashiqin lidhet me aktgjykimin e fundit të Gjykatës Kushtetuese.
“Ne votuam për Nenad Rashiqin sepse aktgjykimi i fundit i Gjykatës Kushtetuese dha një interpretim që nuk e kishim parashikuar. Sipas asaj që kuptuam, ai ka të drejtë të zgjidhet nënkryetar nga komuniteti serb”, tha Bajrami.
Ky zhvillim vjen pas vendimit të Gjykatës Kushtetuese, e cila i dha Kuvendit afat prej 12 ditësh për të përfunduar konstituimin e tij, pas zgjedhjeve të mbajtura muaj më parë. Me zgjedhjen e Rashiqit, përmbyllet procesi i konstituimit të Kuvendit, pasi më herët ishin zgjedhur kryetari dhe nënkryetarët e tjerë.
