Një plan për t’i dhënë fund luftës mes Ukrainës dhe Rusisë, i cili po vijon prej rreth katër vitesh, është përfolur nga sekretarja e shtypit të Shtëpisë së Bardhë, Karoline Leavitt.
Në një dalje për mediat, Leavitt konfirmoi se i dërguari i Trumpit, Steve Witkoff, dhe sekretari i Shtetit, Marco Rubio, kishin rreth një muaj që punonin për planin në fjalë.
“Është në zhvillim, por presidenti e ka mbështetur këtë plan dhe besojmë se duhet të jetë i pranueshëm për të dy palët”, theksoi Leavitt, duke shtuar se Uashingtoni po bisedonte me Kievin dhe Moskën për të kuptuar se për çfarë do të angazhoheshin të dy palët.
Ky ishte edhe konfirmimi i parë zyrtar nga Shtëpia e Bardhë për draft-planin që zyra e presidentit ukrainas, Volodimir Zelenski, bëri me dije se i ishte dorëzuar këtij të fundit dhe se Zelenski do të bisedonte me presidentin amerikan në ditët e ardhshme.
Ndërsa mediat e huaja raportuan se draft-plani ishte përgatitur nga Witkoff dhe këshilltari i Kremlinit, Kirill Dmitriev, dhe se përmbushte shumë kërkesa të Moskës për dhënien fund luftës përfshi lëshimin e krahinave të Luhanskut dhe Donetskut nga Ukraina si dhe reduktimin e forcave të armatosura të këtij vendi Leavitt mohoi se dokumenti ishte në disfavor të Ukrainës.
“Rubio dhe Witkoff janë takuar javën e fundit me përfaqësues të Ukrainës,” shtoi Leavitt, duke theksuar ndërkohë se ishte në dijeni të kritikave dhe dyshimeve në lidhje me draft-planin, të cilat i hodhi poshtë duke kujtuar suksesin historik që presidenti Trump dhe ekipi i tij kishin arritur në Lindjen e Mesme, një referencë armëpushimit mes Izraelit dhe Hamasit në Rripin e Gazës.
Ndërkaq, vendet europiane dolën të enjten kundër planit në fjalë, pasi u raportua se sipas tij Kievi duhet të heqë dorë nga dy krahinat në lindje të vendit të tij dhe të çarmatoset plotësisht, kushte këto që aleatët e Ukrainës prej kohësh i kanë cilësuar si kapitullim.
Zyrtarë ukrainas, si kreu i Komitetit të Politikës së Jashtme dhe zëvendësministri i Jashtëm, e quajtën atë të papranueshëm dhe një tjetër tentativë të Putinit për të fituar kohë dhe për të shmangur sanksionet amerikane.
