Forcat e policisë në Pukë dhe forcat RENEA kanë rrethuar sot një banesë në fshatin Orosh, Fushë Arrëz në Pukë, që prej orëve të para të mëngjesit.
Brenda në banesën e pabanuar në pronësi të Mehill Jakut dyshohet se ndodhen dy persona të kërkuar. Një prej tyre është identifikuar si Juljan Cumrraku.
Burime bëjnë me dije se ky i fundit njihet në zonë si një person me prirje radikale.
Personi tjetër nga Tirana, mbetet ende i paidentifikuar. Ndërkohë, ende nuk është bërë ndërhyrja për arrestimin e tyre.
Njëri prej tyre raportohet të jetë nipi i Mehill Jakut.
Të dy këta persona mendohet se qëndrojnë të fshehur në këtë banesë që prej 1 muaji.
Policia ka bërë thirrje që personat të vetëdorëzohen, por nuk kanë marrë asnjë reagim pozitiv nga objekti. Pas dështimit të negociatave të policisë së Pukës, në vendngjarje kanë mbërritur forcat RENEA, të cilët prej dy orësh vijojë të bëjnë thirrje me megafon.
Njëri prej personave të armatosur, është dëgjuar të thërrasë ‘Allahu Ekber’.
I gjithë fshati Orosh është rrethuar nga policia ndërsa në zonë ka mbërritur gjithashtu dhe një autoambulancë.
