Një shqiptar, rrezikon të dënohet me një vit burg dhe 1,600 euro gjobë pasi vodhi 50 euro nga shtëpia e ministres belge, Zuhal Demir.
Me profesion piktor, ai u paraqit (në mungesë) para gjykatës në Tongeren, Belgjikë, i akuzuar për grabitje në shtëpinë e ministres belge të Arsimit, Drejtësisë dhe Punës, Zuhal Demir. Ngjarja ndodhi më 7 janar 2023, kur i pandehuri hyri përmes një dritareje në banesën e rrethuar të ministres në Genk dhe u largua vetëm me 50 euro të marra nga një kuti kursimesh.
Hetimi në vendngjarje zbuloi gjurmë ADN-je në kutinë e kursimeve, të cilat më pas u përputhën me të dhënat e të dyshuarit. Prokuroria belge tha se ADN-ja e tij ishte marrë më herët si i dyshuar në dosje të ngjashme dhe rezulton e regjistruar edhe në Gjermani e Spanjë.
Në një çështje tjetër ai është dënuar bashkë me dy bashkëpunëtorë, por ADN-ja e tyre nuk u gjet në këtë rast.Shqiptari, i cili refuzoi të paraqitej për hetimet gjatë paraburgimit, ishte dënuar edhe vitin e kaluar me tre vite burg për vjedhje dhe pjesëmarrje në grup kriminal. Prokuroria kërkoi një vit burg dhe 1,600 euro gjobë, duke theksuar se “hyrja me dhunë në një banesë cenon sigurinë”.
Avokatja e tij shpjegoi mungesën e klientit duke deklaruar se ai ka një ndalim hyrjeje në Europë për 8 vite. Pas lirimit të përkohshëm nga dënimi i mëparshëm, ai ishte kthyer në Shqipëri, ku ka adresë të përhershme, punë dhe po shlyen dëmet. Mbrojtja kërkoi një shpallje të thjeshtë fajësie, duke argumentuar edhe tejkalimin e afatit të arsyeshëm, pasi ADN-ja u përputh vetëm në verën e vitit 2024.
Avokatja e tij deklaroi se “nuk ka kuptim që ai (i pandehuri) të sillet nga Shqipëria për një dënim shtesë, ndërkohë që ka stabilizuar jetën e tij dhe po dëmshpërblen viktimat”. Ministrja Zuhal Demir nuk u bë palë civile në proces.
