Presidenti amerikan Donald Trump deklaroi të martën se së shpejti do të fillojë sulmet ndaj objektivave brenda Venezuelës. “Ne do të fillojmë të kryejmë këto sulme edhe në tokë”, tha ai gjatë një takimi të kabinetit.
“Ne e dimë se ku jetojnë ata, ne e dimë se ku jetojnë të këqijtë dhe do të fillojmë shumë shpejt”, theksoi kreu i Shtëpisë së Bardhë. “Këta njerëz vranë mbi 200,000 njerëz vitin e kaluar”, pohoi presidenti amerikan, duke shtuar: “Ne do t’i shtypim këta bastardë”.
Donald Trump po përshkallëzon qëndrimin e tij kundër trafikantëve të drogës, për të cilët Uashingtoni thotë se po tansportojnë lëndë narkotike nga Venezuela me motoskafe drejt SHBA-ve.
Sakaq, mediat amerikane raportojnë se Trump ka qenë duke shqyrtuar goditjen e objektivave brenda Venezuelës për javë të tëra.
Deklarata e së martës prej tij i bëri jehonë atyre që tha të enjten, kur u shpreh para anëtarëve të forcave të armatosura gjatë një telefonate për Ditën e Falënderimeve se përpjekjet për të nisur sulme tokësore “do të fillojnë shumë shpejt”.
Trump argumentoi se fushata ndaj varkave me drogë është e nevojshme për të mbajtur atë larg Shteteve të Bashkuara. “Kushdo që shet drogë në vendin tonë është subjekt i sulmit”, tha Trump.
