Presidenti rus Vladimir Putin viziton Indinë këtë të enjte, në udhëtimin e tij të parë në atë vend që prej nisjes së luftës në Ukrainë, ndërsa përpjekjet e SHBA-së për t’i dhënë fund konfliktit duken të bllokuara.
Vizita vjen në një moment tensioni mes Uashingtonit dhe Nju Delhit, pasi SHBA ka vendosur tarifa dhe kërcënon me sanksione për shkak të marrëdhënieve të ngushta të Indisë me Rusinë dhe rritjes së madhe të importeve të naftës ruse.
India, e cila tradicionalisht ka ndjekur politikën e mos rreshtimit, po përpiqet të ruajë ekuilibrin mes partneritetit të vjetër me Moskën dhe lidhjeve gjithnjë e më të thella me SHBA-në. Putini pritet të mbërrijë në Neë Delhi për një darkë private me kryeministrin Narendra Modi dhe më pas të marrë pjesë në ceremonitë zyrtare dhe takimet tradicionale të samitit vjetor Indi-Rusi.
Në diskutime do të shtrohen projektet e mbrojtjes dhe bashkëpunimi ekonomik, ndërsa Kremlini ka paralajmëruar se marrëdhënia me Indinë mbetet një “partneritet strategjik i privilegjuar”. Putinin e shoqëron një delegacion i gjerë zyrtarësh dhe drejtuesish të kompanive kryesore ruse të energjisë dhe industrisë së armëve.
Analistët presin që Rusia t’i kërkojë Indisë blerje të reja të sistemeve raketore dhe avionëve luftarakë, përfshirë SU-57, të cilin Moska e cilëson “avionin më të mirë në botë”. Vizita zhvillohet në 25-vjetorin e partneritetit strategjik mes dy vendeve, i cili u ndërpre përkohësisht pas nisjes së luftës në Ukrainë.
