Manchester United ka arritur një fitore të thellë 4-1 ndaj Wolverhampton Wanderers, duke u ngjitur në vendin e gjashtë të Premier League dhe duke vazhduar serinë prej pesë ndeshjesh pa humbje në transfertë.
Wolves, të cilët kanë vetëm dy pikë në 14 javët e para dhe po përjetojnë nisjen më të keqe historike në elitën angleze, e nisën mirë sfidën, por Sam Johnstone reagoi në dy raste për të mbajtur portën të paprekur.
United zhbllokoi rezultatin në minutën e 25-të. Casemiro fitoi një duel në mesfushë, nisi aksionin dhe Matheus Cunha asistoi për Bruno Fernandes, i cili shtyu topin në rrjetë nga afër.
“Djajtë e Kuq” kërkuan golin e dytë menjëherë, por Toti Gomes largoi topin mbi vijë, ndërsa Wolves reaguan dhe barazuan në sekondat e fundit të pjesës së parë me një goditje perfekte të Bellegarde pas asistit të Wolfe.
Pjesa e dytë foli sërish për Unitedin. Dalot depërtoi në zonë dhe shërbeu për Bryan Mbeumo, i cili kaloi miqtë në avantazh 2-1. Pak më vonë, Mason Mount vulosi golin e tretë me një goditje precize pas një krosimi të Fernandesit.
Dominimi i United vazhdoi dhe në minutat e fundit, Yerson Mosquera shkaktoi penallti. Bruno Fernandes ekzekutoi saktë, duke kompletuar dopietën dhe fitoren bindëse 4-1.
Wolves regjistrojnë humbjen e tetë radhazi dhe mbeten të fundit, tashmë matematikisht të dënuar të mbyllin vitin në fund të tabelës.
