Kreu i Partisë Demokratike, Sali Berisha, ka bërë deklarata të forta lidhur me akuzat për një takim të organizuar mes deputetit Ervin Salianji dhe Suel Çelës, duke e cilësuar këtë veprim si një shkelje të rëndë të parimeve themelore të partisë.
Berisha u shpreh se gjatë gjithë karrierës së tij politike, edhe në momentet më të vështira, nuk ka bërë kurrë kompromis me krimin dhe se kjo ka qenë dhe mbetet “vija e kuqe” e tij dhe e Partisë Demokratike.
“Salianji ka kaluar vijën e kuqe. Bashkëpunimi me krimin është absolutisht i papranueshëm për këtë parti,” tha Berisha.
Sipas tij, është e patolerueshme që një anëtar i Kryesisë dhe i Këshillit Kombëtar të PD-së të organizojë apo të përfshihet në një takim me Suel Çelën, të cilin Berisha e cilësoi si “një nga kriminelët më të rrezikshëm të Elbasanit dhe drejtues të një prej karteleve më të fuqishme në Europë”.
“Kjo është absolutisht e papranueshme dhe nuk mund të kalojë kurrë. Kush ndërmerr një veprim të tillë, e kalon vijën e kuqe dhe mban përgjegjësi personale,” theksoi ai.
Berisha deklaroi se Partia Demokratike nuk do të pranojë asnjë formë bashkëpunimi me kartelet e drogës apo organizatat kriminale, duke nënvizuar se për takimin në fjalë ekzistojnë jo një, por disa informacione që tregojnë se Suel Çela ka qenë organizatori kryesor në hije.
Në këtë kontekst, kreu i PD-së përgëzoi drejtuesit dhe strukturat e Partisë Demokratike në Elbasan, të cilët, sipas tij, e bojkotuan “me neveri” një takim të tillë.
“Partia Demokratike ka një vijë absolute të kuqe: asnjë bashkëpunim me organizatat kriminale dhe kartelet e drogës,” përfundoi Berisha.
