Në Krishtlindjen e vitit 1914, në mes të Luftës së Parë Botërore, në disa pjesë të frontit flamand ndodhi një nga episodet më të jashtëzakonshme të historisë: ushtarët gjermanë dhe britanikë ndalën luftimet. Ata u takuan në atë që njihej si toka e askujt, për të festuar dhe për të luajtur futboll.
Në atë kohë, futbolli ishte pjesë e jetës ushtarake. I përdorur gjerësisht për të mbajtur trupin në formë dhe ushtarët me moral të lartë. Por askush nuk e kishte parashikuar që topi do të shndërrohej në një simbol paqeje mes armiqve. Mbrëmjen e Vigjiljes së Krishtlindjes, nga llogoret u dëgjuan këngë festive, ndërsa në mëngjes ushtarët dolën nga pozicionet e tyre, shkëmbyen dhurata të vogla dhe nisën lojëra spontane me top.
Sipas dëshmive të kohës, në zonën e Ploegsteert u zhvillua edhe një ndeshje futbolli mes ushtarëve gjermanë dhe një reparti skocez të ushtrisë britanike. Pa arbitër dhe me porta të improvizuara, ndeshja u luajt mbi një terren të ngrirë, mes të qeshurash dhe brohoritjesh. Thuhet se gjermanët fituan 3–2, por rezultati mbeti dytësor përballë domethënies së ngjarjes.
Armëpushimi përfshiu dhjetëra mijëra ushtarë dhe zgjati vetëm një ditë, ndërsa në pjesë të tjera të frontit vijonin luftimet. Ajo Krishtlindje e çuditshme i trembi komandantët, që në vitet në vijim urdhëruan të evitohej çdo formë e afrimit me armikun dhe të mos kishte më asnjë ditë paqe. Në fakt, armëpushimi i radhës ndodhi vetëm pas katër vjetëve. Por, sot Krishtlindjet e 1914-ës kujtohen si një moment i rrallë, ku njerëzit, ushtarë të fronteve kundërshtare, u ngritën spontanisht mbi konfliktin shkatërrues.
