Konflikti në Lindjen e Mesme ka prekur tashmë edhe futbollin. Ndeshja miqësore mes Shqipërisë U-21 dhe SHBA U-21, e planifikuar për t’u zhvilluar më 30 mars në Antalia të Turqisë, është anuluar për arsye sigurie.
Sipas njoftimit zyrtar të FSHF-së, Federata Amerikane e Futbollit ka informuar homologët në Tiranë se për shkak të situatës së krijuar në Lindjen e Mesme, ka vendosur të mos udhëtojë drejt Turqisë, duke e bërë të pamundur zhvillimin e këtij takimi.
Miqësorja e 30 marsit do të ishte përballja e parë historike mes përfaqësueseve U-21 të dy vendeve. FSHF bën me dije se po shqyrton mundësinë për të gjetur një kundërshtar tjetër për Kombëtaren U-21 në të njëjtën datë, në mënyrë që të mos prishet programi përgatitor i skuadrës.
Ndërkohë, kuqezinjtë U-21 kanë të konfirmuar testin e parë miqësor për muajin mars, ndaj Japonisë U-21, që do të zhvillohet më 27 mars po në Antalia.
Fillimisht, FSHF kishte planifikuar dy ndeshje miqësore në Turqi gjatë këtij grumbullimi, përballë Japonisë dhe SHBA-së, më 27 dhe 30 mars, por tashmë programi ka pësuar ndryshim pas tërheqjes së përfaqësueses amerikane.
