Në një bazë rumune me pamje nga Deti i Zi, objektiva të kamufluara ngrihen drejt qiellit, ndërsa dronë të tjerë gumëzhijnë, kjo është prova e fundit e një sistemi mbrojtës të prodhuar në SHBA, i mundësuar nga inteligjenca artificiale, teksa konflikti në Ukrainën fqinje po intensifikohet gjithnjë e më shumë.
Në qendër të vëmendjes ishin interceptorët e dronëve Merops, të prodhuar nga kompania e ish-drejtorit ekzekutiv të Google, Eric Schmidt, Project Eagle, të cilët do të vihen në funksionim në Rumani “brenda pak ditësh”, tha Ministri i Mbrojtjes Radu Miruta.
Shteti anëtar i NATO-s dhe Bashkimit Evropian ndan një kufi tokësor prej 650 km me Ukrainën dhe ka parë dronë rusë të shkelin vazhdimisht hapësirën e saj ajrore, ndërsa Moska sulmon portet e Ukrainës përtej lumit Danub.
Me kërcënimet nga dronë që po shtohen në krahun lindor të NATO-s, shtetet po përpiqen të forcojnë mbrojtjen e tyre ajrore.
“Kërcënimi është real. Dhe me ndërhyrjet e dronëve në vendet aleate të NATO-s, na duhej një zgjidhje për këtë, tha të mërkurën gjeneralmajor Arnoud Stallmann, ndihmës shef i shtabit në Komandën Aleate për Transformimin e NATO-s.
Rumania dhe NATO kanë kaluar dy javë duke provuar dronë interceptorë, radarë, sensorë dhe pajisje bllokimi të prodhuara nga kompani private, ndërkohë që kanë vënë në provë sistemet ekzistuese.
Merops, që tashmë është në përdorim në Ukrainë dhe në Poloni, përfshin një bazë kontrolli tokësore, raketa lëshuese dhe dronë interceptorë Surveyor që mund të operojnë në mënyrë autonome përmes inteligjencës artificiale dhe radarit, thanë burimet e NATO-s.
Ministri i Mbrojtjes Radu Miruta e përshkroi provën si pjesërisht të suksesshme pasi një raketë interceptuese u devijua shumë shpejt në një moment dhe humbi objektivin.
