Gjithsej 555 emigrantë u morën nga Forca Kufitare Britanike gjatë tre ditëve të fundit, duke e çuar në 12,439 numrin total të personave që kanë mbërritur në Mbretërinë e Bashkuar me gomone që nga fillimi i këtij viti.
Megjithatë, kjo shifër është 43 për qind më e ulët krahasuar me të njëjtën periudhë të vitit të kaluar, kur 21,690 emigrantë kishin kaluar tashmë Kanalin Anglez nga Franca.
Sipas autoriteteve britanike, goditja ndaj rrjeteve të kontrabandës nga policia franceze ka detyruar trafikantët të largohen nga plazhet kryesore të nisjes. Po ashtu, dënimet e fundit ndaj personave që drejtonin gomonet pritet të shërbejnë si faktor parandalues.
Agjencia Kombëtare Kundër Krimit (NCA) ka ndërmarrë operacione që kanë penguar furnizimin me gomone drejt veriut të Francës dhe kanë çuar në arrestimin e personave të përfshirë në këtë aktivitet.
Një zëdhënës i Ministrisë së Brendshme britanike deklaroi se qeveria po intensifikon luftën kundër kalimeve të paligjshme me gomone, duke theksuar se dëbimet e emigrantëve kanë arritur nivele rekord, ndërsa kërkesat për azil kanë rënë me 12 për qind.
Ai shtoi se ministri i Brendshëm ka nënshkruar një marrëveshje të re me Francën për të forcuar kontrollet në plazhet franceze dhe për të çuar para drejtësisë trafikantët e qenieve njerëzore.
Ndërkohë, muajt e fundit janë regjistruar edhe raste kur gomonet janë nisur nga Belgjika, pasi grupet e trafikantëve po detyrohen të zgjedhin rrugë më të gjata për të arritur në ujërat britanike.
Në fillim të këtij viti, Britania dhe Franca ranë dakord për një paketë financimi prej 662 milionë paundësh për tre vjet, me synim forcimin e masave të sigurisë dhe patrullimeve në plazhet franceze.
