Mobilizime dhe protesta po zhvillohen sot, më 1 maj 2026, në kuadër të Ditës së Punës, me pjesëmarrjen e ADEDY-së, Konfederatës së Përgjithshme të Punëtorëve Grekë (GSEE), Qendrës së Punës së Athinës dhe PAME-së.
Tubimi i përbashkët i ADEDY-së, GSEE-së dhe Qendrës së Punës së Athinës është planifikuar në orën 11:00 në sheshin Klafthmonos, ndërsa PAME ka thirrur një tubim në orën 10:30 në sheshin Sintagma.
Protesta të ngjashme do të zhvillohen edhe në Selanik, si dhe në qytete të tjera të Greqisë.
Ndërprerje në transportin hekurudhor dhe urban
Punonjësit e transportit publik marrin pjesë në grevë me ndalesa pune dhe greva 24-orëshe. Në veçanti, transporti me shina (metro, ISAP dhe tramvaj) do të qëndrojë i bllokuar gjatë gjithë ditës, pasi punonjësit kanë shpallur grevë 24-orëshe nga fillimi i shërbimit të së premtes deri në përfundim të tij.
Gjithashtu, trenat do të ndalen në të gjithë rrjetin hekurudhor të vendit, përfshirë edhe linjat periferike.
Ndalesa pune në autobusë dhe trolejbusë
Autobusët dhe trolejbusët do të qarkullojnë vetëm nga ora 09:00 deri në 21:00. Punonjësit do të mbajnë ndalesa pune nga fillimi i shërbimit deri në orën 09:00 dhe nga ora 21:00 deri në përfundim të qarkullimit (00:00).
Anijet mbeten në porte
Anijet do të qëndrojnë të ankoruara në të gjitha portet e vendit, pasi Federata Panhelenike e Detarisë (PNO) ka shpallur grevë 24-orëshe në mbarë vendin, në kuadër të protestave të 1 Majit. Greva ka nisur në orën 00:01 dhe do të zgjasë deri në mesnatë, duke prekur të gjithë transportin detar – nga linjat bregdetare deri te kabotazhi – dhe duke ndërprerë lëvizjen e pasagjerëve dhe mallrave.
ADEDY thekson në deklaratën e saj se nevoja për veprim dhe luftë kolektive është më urgjente se kurrë:
“Vazhdojmë në rrugën e mobilizimeve masive, duke kërkuar drejtësi, demokraci dhe një shtet që i shërben shoqërisë dhe jo interesave të pakicës.
Nderojmë përpjekjet dhe sakrificat e klasës punëtore, nga Çikago i vitit 1886 deri më sot, dhe vijojmë luftën për paga të denja, punë të qëndrueshme, drejtësi sociale dhe demokraci në vendin e punës.”
Ndër kërkesat kryesore të ADEDY-së janë:
1. rikthimi i pagave të 13-të dhe të 14-të;
2. rritje reale e pagave përmes marrëveshjeve kolektive;
3. heqja e kontributit 2% për papunësinë;
4. zhbllokimi i shkallëve të pagave për periudhën 2016–2017;
5. rritja e kufirit të të ardhurave të patatueshme në 12,000 euro;
6. zgjerimi i kompensimit për punë të rrezikshme dhe të dëmshme;
7. punësime të përhershme masive në sektorin publik, sidomos në shëndetësi, arsim dhe sigurime shoqërore;
8. forcimi i sistemit shëndetësor publik;
9. shfuqizimi i ligjeve kundër punëtorëve;
10. mbrojtja e të mirave publike dhe ndalimi i privatizimeve.
Nga ana e saj, GSEE ka shpallur një grevë të përgjithshme 24-orëshe për sot dhe u bën thirrje të gjithë punëtorëve të marrin pjesë masivisht në protestat në të gjithë vendin.
“1 Maji 2026 është një kujtesë se asgjë nuk fitohet pa përpjekje kolektive. Ne grevojmë jo vetëm për atë që kemi humbur, por edhe për atë që duhet të fitojmë. Grevojmë që zëri i punëtorëve të dëgjohet sot dhe të përkthehet nesër në drejtësi,” thekson Konfederata.
Sipas GSEE-së, prioritetet kryesore për këtë 1 Maj janë:
1. forcimi i kuadrit për negociata kolektive dhe rritje të pagave;
2. rikthimi i Marrëveshjes Kombëtare Kolektive të Punës te partnerët socialë;
3. përballimi i krizës së strehimit dhe rritjes së çmimeve;
4. garantimi i shëndetit dhe sigurisë në punë;
5. mbrojtja e pasurive publike;
6. transparencë, meritokraci dhe barazi në jetën publike;
7. ulja e pabarazive ekonomike, sociale dhe arsimore.
Qendra e Punës së Athinës thekson se 1 Maji nuk është vetëm një ditë përkujtimore, por edhe një ditë lufte:
“Është një lidhje e gjallë mes sakrificave dhe fitoreve të së kaluarës me kërkesat e së tashmes. Nga viktimat e Çikagos deri te betejat në Selanik, historia e klasës punëtore është udhërrëfyes për vazhdimin e luftës për drejtësi sociale, barazi dhe dinjitet.”
Ndërsa PAME thekson:
“Frymëzohemi nga betejat e mëdha të së kaluarës dhe angazhohemi për të ardhmen, për të bërë gjithçka që klasa punëtore të përmbushë misionin e saj historik. Të forcojmë luftën, të përballemi me pushtetin e kapitalit, të çlirohemi nga shfrytëzimi dhe të hapim rrugën për një shoqëri pa varfëri, luftëra, padrejtësi dhe shtypje.”
