Presidenti i Afganistanit, Ashraf Ghani, e ka miratuar lirimin e 1500 të burgosurve talibanë si pjesë e përpjekjeve për të siguruar marrëveshje të paqes me grupin famëkeq.
Sidoqoftë, në vendimin e presidentit kërkohet që të gjithë të burgosurit që do të lirohen të ofrojnë garanci me shkrim se nuk do të kthehen në fushëbetejë për të luftuar.
Në anën tjetër, talibanët do t’i lirojnë mbi 1000 trupa të forcave qeveritare, të cilat i kishin zënë rob gjatë aksioneve të tyre të mëparshme, shkruan “BBC”.
Marrëveshja për shkëmbimin e të burgosurve erdhi në kohën kur Shtetet e Bashkuara e filluan largimin e trupave nga Afganistani si pjesë e paktit të nënshkruar më herët me talibanët.
Sipas vendimit të presidentit afgan, 1500 të burgosurit talibanë do të lirohen brenda 15 ditëve apo nga 100 të burgosur për çdo ditë gjatë kësaj periudhe.
Kështu, do të fillojnë bisedimet mes qeverisë afgane dhe talibanëve paralelisht me procesin e lirimit të të burgosurve. Nëse arrihet përparim në negociata, qeveria është zotuar se do t’i lirojë edhe nga 500 të burgosur të tjerë çdo dy javë derisa të arrihet shifra prej 5 mijë personave të liruar.
Pjesë e marrëveshjes është edhe zotimi i talibanëve për zvogëlimin e dhunës dhe ndalimin e veprimtarisë së grupit Al-Qaeda apo të ndonjë grupi tjetër ekstremist në zonat që kontrollohen nga ta.
