Autoritetet shëndetësore në Mbretërinë e Bashkuar kanë lëshuar një paralajmërim urgjent për pacientët që përdorin ilaçin për tensionin e gjakut Ramipril, pas zbulimit të një gabimi në paketim që mund të ketë vënë disa pacientë në rrezik.
Sipas raportimeve, një seri e kufizuar e këtij ilaçi është paketuar gabimisht, ku disa kuti të shënuara si 2.5 mg mund të përmbajnë në fakt kapsula 10 mg. Ky ndryshim i dozës mund të çojë në marrje më të lartë se e rekomanduara të ilaçit, duke rritur rrezikun për efekte anësore.
Pavarësisht se vetëm një batch i vogël është i prekur, Ramiprili është një ilaç shumë i përdorur, me rreth 35 milionë receta të lëshuara çdo vit në Angli, ndaj autoritetet kanë kërkuar që të gjithë pacientët të kontrollojnë me kujdes paketimin e tyre.
Agjencia rregullatore britanike e barnave Medicines and Healthcare products Regulatory Agency u ka bërë thirrje përdoruesve të verifikojnë:
- dozën e shënuar në kuti (2.5 mg apo 10 mg)
- numrin e serisë së produktit
- dhe të kontaktojnë farmacistin nëse dyshojnë se kanë marrë paketimin e gabuar
Autoritetet gjithashtu kanë këshilluar pacientët të mos e ndërpresin vetë trajtimin, por të kërkojnë këshillë mjekësore.
Ndër simptomat e mundshme nga marrja e dozës më të lartë se e nevojshme përfshihen: marramendje, dobësi, rënie e tensionit të gjakut dhe në raste më serioze, të fikët.
Pacientëve u kërkohet të tregojnë kujdes të shtuar dhe të kërkojnë ndihmë mjekësore nëse shfaqin simptoma shqetësuese.
