Duke filluar nga dita e hënë, të gjithë qytetarët në Shqipëri do të duhet të aplikojnë për një leje në mënyrë që të mund të dalin nga banesa për të blerë ushqime apo gjetkë.
Qytetarët që do të lejohen do të mund të lëvizin për një orë dhe të kryejnë blerjet e tyre. Qeveria ka vendosur që vetëm NJË familjar mund të marrë leje, ndërsa pensionistët nuk do të mund të pajisen me leje dalje.
Kryeministri dhe drejtoresha e AKSHI-t kanë shpjeguar sesi do të funksionojë aplikimi për të marrë lejen. Ai është propozuar për qytetarët në dy forma:
I pari vjen përmes portalit online E-Albania. Pas regjistrimit në të, qytetarët mund të hyjnë tek kategoria “Shërbimi i Familjes” dhe aty mund të gjeni shërbimin e titulluar “Leje për Dalje”.
Qytetarët mund të gjejnë gjithashtu vendin ku aplikohet, duke shkruar në fushën e kërkimit ‘leje për dalje’. Njoftimi do të vijë përmes telefonit ose e-mailit.
Rruga e dytë për të marrë lejen është ajo përmes një mesazhi. Qytetarët mund të aplikojnë në numrin e gjelbër 55155.
Vendoset numri i kartës së identitetit, vend bosh dhe ora. Pas miratimit, SMS vjen në celular dhe mund të kontrollohet nga policia.
NJOFTIMI I PLOTE I AUTORITETEVE:
“Leje për dalje” është një shërbim elektronik, i cili u mundëson qytetarëve të aplikojnë online për t’u pajisur me leje për të dalë nga banesa e tyre për arsye të ndryshme si: për pazar, farmaci apo arsye të tjera urgjente.
Dokumentacioni i nevojshëm: Për këtë shërbim nuk nevojitet dokumentacion shoqërues.
Hapat e procedurës: Identifikohuni si qytetar në portalin e-Albania; Zgjidhni shërbimin “Leje për dalje”; Klikoni butonin “Përdor”; Kryeni aplikimin duke përzgjedhur orarin, si dhe personin që do të dalë nga familja juaj (në rastet kur nuk jeni ju personalisht).
Vetëm një anëtar i familjes mund të aplikojë për leje për dalje gjatë 24 orëve brenda fashës orare të lejuar 05.00-13.00; Në rast se një nga anëtarët e familjes punon në një qytet të ndryshëm nga vendbanimi aktual, lejohet të vijojë aplikimi për leje dalje dhe për këtë anëtar, pasi kryhet në kohë reale verifikimi mbi vendodhjen e punës; Miratimi do të dërgohet në adresën e-mail që keni përdorur për regjistrimin në portalin në e-Albania dhe/ose sms. – Në rast se dëshironi të përdorni një email tjetër, ju duhet ta ndryshoni në rubrikën “Hapësira Ime” duke klikuar: Ndrysho të dhënat e llogarisë. Policia mund të verifikojë në kohë reale nëse një qytetar ka një miratim të autorizuar ose jo.
Koha e nevojshme e marrjes së shërbimit: Menjëherë. Kostot: Pa pagesë. Për çdo pyetje apo paqartësi mbi përdorimin e shërbimit mund të kontaktoni në adresën helpdesk@e-albania.al
