Ministria e Shëndetësisë ka dhënë shifrat zyrtare për numrin e fëmijëve dhe grave shtatzëna të prekur nga koronavirusi në Shqipëri.
Në total ka patur 5 gra shtatzëna dhe 35 fëmijë të infektuar me Covid, teksa deri më tani 4 gra shtatzëna janë shëruar, së bashku me 22 fëmijë.
Aktualisht në spitalin infektiv në Tiranë është e shtruar gruaja me origjinë nga Fieri, e cila u konfirmua e prekur ditën e djeshme. Gruaja shtatzënë shkoi në Tiranë për të takuar prindërit, por kur u kthye infektoi me koronavirus djalin 2 vjeçar dhe vjehrrën. Po ditën e djeshme gruaja dhe i biri u transportuan në spitalin infektiv të Tiranës për shkak të ndërlikimit të gjendjes së tyre shëndetësore.
Në lidhje me këto shifra, specialistja ISHP-së Rovena Daja, njoftoi se deri më tani situata është e qëndrueshme dhe se qytetarët duhet të mundohen të mos lëvizin nga qyteti në qytet pasi rrezikojnë të infektohen.
“Situata është e qëndrueshme. Të gjithë janë duke rritur vigjilencën, pasi shpresojmë se duke lehtësuar masat, të mos rritet numri. Cdo gjë tani varet nga qytetarët, mos lëvizni nga njëri qytet në tjetrin, kjo është arsyeja pse kemi pasur raste të reja. Gruaja shtatzënë (nga Fieri) është në gjendje të stabilizuar, i takon klinikës të vendosë nëse do të qëndrojë apo jo e shtruar. Deri tani janë 35 fëmijë të prekur, 22 janë shëruar. 5 gra shtatzënë janë prekur, 4 janë shëruar“, tha ajo.
Kujtojmë se këtë të enjte zyrtarisht janë konfirmuar 10 raste të reja. Prej rasteve te reja, 3 jane ne Tirane, 3 ne Kruje, 2 ne Shkoder dhe 2 ne Kamez.
Aktualisht në dy spitalet COVID në Shqipëri, janë të shtuar 38 pacientë dhe vetëm 7 prej tyre janë në terapi intensive
Pjesa më e madhe e të prekurve po ndiqen nga mjeku i familjes ose janë asimptomatikë, ndërsa momentalisht në dy spitalet COVID, në spitalin infektiv dhe spitalin “Shefqet Ndroqi”, aktualisht janë të shtruar 38 pacientë dhe vetëm 7 prej tyre janë në terapi intensive.
