Futbollistëve dhe trajnerëve në Suedi nuk do t’iu kërkohet që të bëjnë testet për koronavirus para seancave stërvitore apo ndeshjeve si pjesë e protokollit të vendit që është propozuar për rikthimin e këtij sporti gjatë pandemisë COVID-19. Përkundrazi, ata do të duhet të plotësojnë çdo mëngjes një formë të vetëvlerësimit dhe ta dërgojnë me email tek mjeku i tyre i klubit, jo më vonë se dy orë para stërvitjeve, ose para se të shkojnë në një stadium për një ndeshje. Mjeku më pas do të vlerësojë nëse lojtarët dhe trajnerët janë mjaft të shëndetshëm për të marrë pjesë në stërvitje apo ndeshje. Ata duhet të qëndrojnë në shtëpi nëse kanë simptoma të koronavirusit.
Këto këshilla për lojtarët dhe trajnerët janë të miratuara në shoqërinë suedeze që vetëm njerëzit që “ndihen aq të sëmurë sa duhet ta vizitojnë spitalin, do t’i nënshtrohen testit për koronavirus”, thuhet në njoftimin e ligës suedeze, raportojnë mediumet e huaja të mërkurën.
“Pra, në përputhje me këtë, ne nuk kemi mundësinë për të testuar lojtarët dhe trajnerët e futbollit kur të rifillojnë garat”, vazhdon njoftimi i ligës suedeze.
Protokollet e rikthimit në stërvitje dhe ndeshje, të cilat u publikuan nga liga suedeze, janë paraqitur edhe pranë Autoritetit Shëndetësor Publik të vendit. Në fakt, Autoriteti pritet të vendosë këtë javë nëse dy kategoritë e para të futbollit suedez mund të fillojnë muajin tjetër. Po shpresohet që ndeshjet të fillojnë më datën 14 qershor, më shumë se dy muaj pas datës që ishte planifikuar të niste sezoni 2020, por që u shty për shkak të përhapjes së pandemisë së koronavirusit.
Shoqëria, suedeze nuk është mbyllur plotësisht gjatë shpërthimit të virusit sepse qeveria dhe autoritetet shëndetësore kanë zgjedhur të mos vendosin aq shumë kufizime për njerëzit sikurse në vendet e tjera.
Kjo reflektohet edhe në protokollet të propozuara për kthimin e futbollit, të cilat ndryshojnë nga ligat e tjera në Evropë.
