Kryeministri Rama në një shkrim të publikuar në rrjetet sociale thekson se për kufijtë mes Shqipërisë dhe Greqisë nuk mund të ekzistojë asnjë marrëveshje e fshehtë
Kryeministri i Shqipërisë, Edi Rama, ka reaguar përsëri në lidhje me pretendimin e Greqisë se planifikon të zgjerojë ujërat territoriale në Detin Jon nga 6 në 12 milje, si dhe mbi debatet dhe reagimet në Shqipëri mbi qëndrimet e shtetit grek për këtë çështje, transmeton Anadolu Agency (AA).
Kryeministri Rama në një shkrim të publikuar në rrjetet sociale thekson se për kufijtë mes dy shteteve (Shqipërisë dhe Greqisë) s’mund të ekzistojë asnjë marrëveshje e fshehtë.
“Nuk bëhen marrëveshje të fshehta për këtë punë, sepse s’kanë asnjë vlerë mbi detin e mbi tokën për sa kohë janë të fshehta. Bëhen marrëveshje të negociuara me vite, të cilat emrin marrëveshje e marrin kur bëhen publike dhe vlerën si marrëveshje e marrin vetëm kur kalojnë provën e institucioneve kushtetuese të shtetit”, shkruan Rama.
Rama shprehet se fjala e kryeministrit grek, Kyriakos Mitsotakis, në Parlamentin e Greqisë, “nuk ka asnjë lidhje me ujërat territorialë të Shqipërisë, me ndonjë marrëveshje mes Greqisë dhe Shqipërisë apo me ndonjë punë të Shqipërisë që lidhet me të drejtën e vendit fqinj për ato 12 miljet e stërpërfolura”.
“E drejta e 12 miljeve buron nga Konventa Ndërkombëtare e të Drejtës së Detit dhe Greqia nuk ka kufij detarë vetëm me Shqipërinë, po edhe vende të tjera, kështu që kryeministri grek është në të drejtën e vet kur flet në parlamentin e tij, për detet e Greqisë. Ndërkohë, për sa i përket deteve tona, Shqipëria e ka ushtruar në vitin 1990 të drejtën e saj të shtrirjes në ato milje, në bazë të asaj konvente ndërkombëtarë të vitit 1982. Zgjerimi i bërë nga Shqipëria në marsin e 1990-ës është depozituar në Kombet e Bashkuara dhe as është kontestuar, as mund të kontestohet nga Greqia”, thekson Rama.
Sipas tij, negociatat për arritjen e një marrëveshjeje për të ashtuquajturin delimitim të ujërave mes Shqipërisë e Greqisë, i kanë zhvilluar me qeverinë e mëparshme greke dhe marrëveshja nuk është arritur të mbyllet.
“Ne duam ta arrijmë një marrëveshje me Greqinë për këtë çështje, siç kemi arritur edhe të tjera e siç duhet të arrijmë të tjera akoma. Ne Greqinë e konsiderojmë një nga tre partnerët strategjikë më të afërt të Shqipërisë, së bashku me Italinë dhe Turqinë. Ne nuk kemi pretendime territoriale ndaj Greqisë dhe Greqia nuk ka të tilla ndaj nesh, por ne kemi pretendime reciproke për bashkëkombasit që jetojnë në shtetin tjetër. Ne jemi fqinj të shkëlqyer në nivelin e marrëdhënies mes popujve, por s’kemi shkëlqyer gjithnjë në marrëdhëniet politike mes shteteve e qeverive”, shkruan kryeministri i Shqipërisë.
Sipas Ramës, sot marrëdhëniet mes dy qeverive në Athinë e në Tiranë, “janë të mira dhe kanë një potencial të madh për t’u bërë të shkëlqyera”.
Kujtojmë se disa ditë më parë kryeministri grek, Kyriakos Mitsotakis, gjatë seancës në Parlamentin e Greqisë njoftoi se planifikojnë të zgjerojnë ujërat territoriale në Detin Jon nga 6 në 12 milje. Deklaratat e tij shkaktuan reagime në Shqipëri të zyrtarëve, politikanëve dhe përfaqësuesve të shoqërisë civile.
Ndërkohë, pas qëndrimeve të shtetit grek, gjatë ditës së djeshme, lideri i opozitës dhe njëkohësisht kryetari i Partisë Demokratike të Shqipërisën(PD), Lulzim Basha, në rrjetet sociale i bëri thirrje kryeministrit Rama, që të “bëjë transparencë çfarë po ndodh me negociatat për detin”.
Ndërkaq, në lidhje me reagimin e Bashës, Rama ka theksuar po gjatë ditës së djeshme se negociatat janë ndalur prej kohësh, që pas ndryshimit të qeverive në Greqi.
Reagime pas deklaratave të zyrtarëve të Greqisë për ujërat territoriale ka pasur edhe nga disa aktivistë të shoqërisë civile, të cilët sot në një deklaratë për mediat, kërkuan, sipas tyre, transparencë për negociatat e mundshme mes dy palëve, si dhe transparencë në lidhje me pretendimet e Greqisë që synon të “zgjerojnë ujërat territoriale në Detin Jon nga 6 në 12 milje”.
Ndryshe, në prill të vitit 2018, Ministria për Evropën dhe Punët e Jashtme e Republikës së Shqipërisë konfirmoi zyrtarisht fillimin e bisedimeve për kufizimin e zonave detare mes Shqipërisë dhe Greqisë.
Në dy vitet e fundit janë mbajtur disa raunde të negociatave, ndërkohë mes palëve ende nuk ka një marrëveshje përfundimtare mbi kufizimin e zonave detare.
Në vitin 2009, mes Qeverisë së Shqipërisë dhe Qeverisë së Greqisë u nënshkrua një marrëveshje për çështjen e kufizimit të zonave detare, por marrëveshja në fjalë u shfuqizua në vitin 2010 nga Gjykata Kushtetuese e Shqipërisë që e shpalli të pavlefshme juridikisht dhe antikushtetuese.
