Kosova dhe Izraeli arritën sot marrëveshjen për njohje reciproke pas ndërmjetësimit të Shteteve të Bashkuara të Amerikës. Presidenti amerikan, Donald Trump e ka konsideruar këtë një ngjarje historike, por në një koment në Twitter ai e ka prezantuar Kosovën si “vendi me shumicë myslimane” duke shkaktuar mjaft reagime në Prishtinë.
“Një ditë tjetër e madhe për paqe me Lindjen e Mesme – Kosova me shumicë myslimane dhe Izraeli janë pajtuar për normalizim marrëdhëniesh dhe për vënie të marrëdhënieve diplomatike. Ju lumtë!”, ka shkruar Trump në Twitter.
Etiketimi si “Kosova myslimane” nuk u ka pëlqyer shumë komentuesve që rrjetet sociale që thonë se “Kosova së pari është shqiptare dhe më pas evropiane”.
Për çështjen e njohjes reciproke Kosovë – Izrael ka reaguar edhe kryeministri izraelit, Benjamin Netanyahu. Ai ka thënë se pas marrëveshjes, Kosova do të jetë “shteti i parë me shumicë myslimane që hapë ambasadë në Jerusalem”. ©LAPSI.al
