Qeveria federale gjermane do të ofrojë 64.5 miliardë euro gjatë katër viteve të ardhshme për t’u marrë me pasojat e fluksit të emigrantëve, njofton Ministria e Financave. Shuma do të përdoret për të rritur integrimin e emigrantëve si edhe për të luftuar arsyet pse njerëzit emigrojnë nga vendet e tyre të origjinës.
Vetëm për vitin 2021, Ministria Gjermane e Financave po planifikon të shpenzojë 20.1 miliardë €, raporton Der Spiegel.
Këto para do të përdoren për të ndërtuar shkolla, infrastrukturë dhe programe për të zvogëluar korrupsionin në vendet e Botës së Tretë, në mënyrë që të luftohet emigracioni që në vendin e origjinës dhe t’i inkurajojë njerëzit të kenë më pak arsye për tu larguar.
Një pikë tjetër e rëndësishme është edhe integrimi. Ministri i Financave Olaf Scholz i socialdemokratëve njofton se do të shpenzojë edhe 8.2 miliardë euro për masat e integrimit. Në të njëjtën kohë, përfitimet sociale për migrantët në Gjermani do të arrijnë në 22.9 miliardë €.
Megjithëse ekziston shpresa që programe të tilla ndihme mund të ndihmojnë në ndalimin e valës së emigrantëve nga Lindja e Mesme dhe Afrika, popullsia me rritje të shpejtë në ato rajone së bashku me korrupsionin endemik, mund të nënkuptojë që një valë tjetër masive mund të godasë Evropën gjatë viteve të ardhshme. Instituti për Ekonomi dhe Paqe tregon se afërsisht 1.2 miliardë njerëz mund të zhvendosen për shkak të mungesës së ushqimit dhe ujit gjatë 30 viteve të ardhshme, ndërsa shumica do t’i drejtohen Evropës dhe Amerikës së Veriut.
Duke marrë parasysh edhe pasojat e mëdha ekonomike të krizës së koronavirusit, për të cilat shteti gjerman tashmë ka reaguar duke shpenzuar miliarda euro, kostoja shtesë e migrantëve sigurisht që do të ngrejë pikëpyetje në lidhje me qëndrueshmërinë e këtyre shpenzimeve për një periudhë afatgjatë.
Javën e kaluar, Ministria Gjermane e Punës njoftoi se refugjatët dhe anëtarët e familjes së tyre i kushtojnë shtetit 6 miliardë euro çdo vit. Gjermania gjithashtu ka paguar kosto të mëdha për trajnimin, punësimin dhe integrimin e refugjatëve. Në vitin 2018, qeveria gjermane shpenzoi një rekord prej 23 miliardë eurosh për migrantët, përfshirë subvencionet e qirasë, pagesat e papunësisë, mësimet e gjuhës dhe përfitime të tjera.