Kryetari i Partisë Demokratike Lulzim Basha ishte sot në njësinë 11, në Tiranë, ku zhvilloi takime me biznesin e vogël. Në vëmendje ishte kriza ekonomike e krijuar nga keqqeverisja dhe që ka dalë në pah nga pandemia e COVID-19. Kryetari Basha u njoh me situatën e rëndë në këtë zonë dhe krizën që po përjetojnë këto biznese.
“Sa vjen, me shumë vështirësi, me shumë vështirësi. Ta mbyllim? Të rrijmë në shtëpi fare, s’bëhet. Ça t’i bëjmë, ja mbaj djalin këtu. Mbaj dhe shkollën dhe djalin dhe vetë, familjen, kemi 2 punëtorë. Me shumë sforco të mëdha ” u shpreh pronari i një Fast-Food-i.
Gjatë takimit, përfaqësuesit e biznesit thonë se po presin ndonjë ndihmë tjetër nga qeveria, sepse tani po kalojnë kohë shumë të vështirë.
“Po të kishim një farë ndihme të paktën për punëtorë apo diçka për biznesin, diçka, ose ça mund të bëhesh ndonjë gjë përshembull, se tani është kohë e vështirë shumë, kemi kaq kohë që po presim”.
Basha ngriti zërin për situatën e keqe ku ndodhet biznesi në Shqipëri, që sipas tij është braktisur totalisht nga qeveria.
“Familjet janë në pikën e tyre të fundit, bizneset po kështu, shëndetësia në kolaps, papunësia në rritje. Do të vazhdojë sa kohë që kemi një qeveri që mendon për vete dhe nuk mendon për njerëzit. Ka nevojë për një qeveri që të punojë për njerëzit. E para e punës të punojë dhe së dyti të gjithë paratë e buxhetit, të gjitha fondet e shtetit në kohë krize si kjo, duhet të shkojë për të ndihmuar njerëzit në nevojë, shëndetësinë, ekonominë sipërmarrjen. Nuk ka asnjë prioritet tjetër. Shëndeti dhe jeta janë të parat, ekonomia e dyta. Duhet të bëhemi të gjithë bashkë për ta ndryshuar këtë realiteti, ndryshimi vjen duke ndryshuar qeverinë, nuk ka rrugën tjetër”, tha Basha.
Lideri demokrat tha se jemi i vetmi vend në Ballkan ku nuk jepet ndihmë ekonomike për familjet në nevojë.
“Problemi më i madh që kemi përveç pandemisë dhe krizës ekonomike është që jemi i vetmi vend në Ballkan ku nuk jepet ndihmë ekonomike për familjet në nevojë. Po nuk i dhe ndihmë ekonomike ai nuk blen dot as bukën e gojës. Krizë shumë e thelle, duhet të gjejmë forcën të bashkohemi dhe ta ndryshojmë se kështu nuk vazhdohet më. Shqipëria i ka të gjitha mundësitë, njësoj si Maqedonia, njësoj si Kosova, ti ndihmojë të gjitha familjet që kanë nevojë për ndihmë edhe biznesin. Por duhet të kemi një qeveri që të mendojë për njerëzit”, tha Basha.
