Një grup njerëzish u ballafaquan me mbështetësit e presidentit Trump pasi grupi “Black Lives Matters” bëri thirrje për “të mbrojtur Washington-in”
Mijëra njerëz u mblodhën sot në kryeqytetin amerikan Washington në mbështetje të presidentit Donald Trump rreth rezultateve të zgjedhjeve presidenciale të 3 nëntorit, që është hera e dytë që mbahen tubime të këtilla.
Një grup njerëzish u ballafaquan me mbështetësit e presidentit Trump pasi grupi “Black Lives Matters” bëri thirrje për “të mbrojtur Washington-in”.
Përkrahësit e Trump-it u mblodhën në Freedom Plaza, një bllok nga Shtëpia e Bardhë, e cila ka qenë një pikë qendrore për shumicën e demonstratave në tubimin “Marshim për Trump-in”, disa ditë para se të hidhen votat e Kolegjit Zgjedhor për të deklaruar presidentin e 46-të të SHBA-së.
Presidenti i zgjedhur Joe Biden ka siguruar 306 vota të Kolegjit Zgjedhor në garën presidenciale krahasuar me 232 votat për Trump. Rivali demokrat mori gati 81,3 milionë vota ndërsa presidenti republikan fitoi 74,2 milion vota.
Mbështetësve të Trump-it iu bashkangjitën qindra pjesëtarë të milicisë supremaciste të bardhë “Proud Boys”, të cilët mbanin flamuj amerikanë dhe parulla që shkruanin “Ne ju mbështesim Z. President” dhe “Stop vjedhjes”.
Mbështetësit parakaluan pranë Gjykatës Supreme, ku ish-Këshilltari i Sigurisë Kombëtare i Trump-it, Michael Flynn, bëri paraqitjen e tij të parë publike pasi presidenti e fali atë muajin e kaluar.
“Gjykatat nuk do të vendosin se kush do të jetë presidenti i ardhshëm i SHBA-së. Ne, populli vendosim”, u tha Flynn demonstruesve.
“Në këtë moment të rëndësishëm të kohës sonë, ne duhet të lutemi që e vërteta të triumfojë mbi gënjeshtrën, drejtësia të triumfojë mbi abuzimin dhe mashtrimin, ndershmëria të triumfojë mbi korrupsionin”, tha ish-këshilltari.
Protesta e parë masive u mbajt në 15 nëntor, ndërsa Trump vazhdon të sfidojë rezultatet e zgjedhjeve dhe pretendon mashtrim dhe parregullsi elektorale, por autoritetet kanë thënë që zgjedhjet e vitit 2020 ishin më të sigurtat në histori.
“Ne sapo kemi filluar të luftojmë!!!”, shkroi Trump në Twitter përderisa mbështetësit e tij mblidheshin në tubimin.
Presidenti i zgjedhur Joe Biden pritet të marrë detyrën më 20 janar.
Atlanta
