BBC
Air France dhe Airbus janë shpallur fajtorë për vrasje nga pakujdesia (manslaughter) lidhur me një aksident ajror të vitit 2009, ku humbën jetën 228 persona.
Gjykata e Apelit në Paris e shpalli kompaninë ajrore dhe prodhuesin e avionëve fajtorë për përgjegjësi penale korporative në lidhje me incidentin, ku fluturimi AF447 mes Rio de Janeiro dhe Paris u rrëzua në Oqeanin Atlantik.
Avioni i pasagjerëve humbi kontrollin (stall) gjatë një stuhie dhe u përplas në ujë, duke shkaktuar vdekjen e të gjithë personave në bord.
Një gjykatë më parë i kishte shpallur të pafajshme kompanitë në prill 2023, por ato u shpallën fajtore pas këtij apelimi.
Avioni tip Airbus A330 u zhduk nga radarët gjatë një stuhie, ndërsa mbetjet e tij u gjetën pas një kërkimi të gjatë në 10,000 km² të shtratit të detit.
Kutia e zezë e avionit u gjet pas muajsh kërkimesh në thellësi të detit në vitin 2011.
Të 12 anëtarët e ekuipazhit dhe 216 pasagjerët në bord humbën jetën kur avioni u rrëzua në det nga një lartësi prej 38,000 këmbësh (11,580 metrash), duke e bërë këtë ngjarjen më vdekjeprurëse në historinë e aviacionit francez.
Të afërm të disa prej viktimave — kryesisht shtetas francezë, brazilianë dhe gjermanë — u mblodhën të mërkurën për të dëgjuar vendimin e gjykatës.
Kompanive u është kërkuar të paguajnë gjobën maksimale prej 225,000 eurosh secila (261,720 dollarë ose 194,500 paund), por disa familje të viktimave e kanë kritikuar shumën, duke e cilësuar si një dënim simbolik.
