1,610 total views, 1 views today
Kryetari në detyrë i PD-së Lulzim Basha ka zhvilluar sot takime me demokratë të Tiranës në degët 7, 10, 12 dhe 14.
“Përballë sofistikimit të metodës së blerjes së votës, të intimidimit, të patronazhit si sistemi i Sigurimit të Shtetit, përballë të gjithë padrejtësive me të cilat jemi përballur në nivel institucional, politik dhe ju vetë në nivel personal nga mëngjesi deri në darkë, përballë anormalitetit, çmimit të lartë të sakrificës personale me të cilën keni paguar aktivizimin tuaj politik në këtë fushatë dhe në betejat që i paraprinë asaj, prapëseprapë, vota e qytetarëve tregon vetë se ndonëse në kushtet të barabarta njësoj si në ’91-shin pa asnjë pushtet, përballë një pushteti i cili kombinonte egërsinë, barbarinë e ’91-shit me urrejtjen dhe makinerinë e dhunës së 2001-shit dhe bandat kriminale si faktor i pandashëm i pushtetit ilegjitim të Edi Ramës në këto 8 vite, nuk ja dolën as t’i ulnit kokat, as t’ju bënit të dorëzoheshit”, tha Basha.
Në vijim, Basha tha se ne e dinim që beteja do të ishte e pabarabartë, e ndaj morëm të gjitha masat që t’i përgjigjeshim me bashkimin më të madh të mundshëm popullor. Që nga koalicioni më i gjerë politik, tek lidhjet me grupet e interesit që morën format e kontratave programore, treguan se me vetëdijen që po përballeshim me një kundërshtar i cili kishte shkelur çdo rregull të shkruar dhe nuk kishte ndërmend as t’i zbatonte ato, ne do t’i përgjigjeshim me mobilizimin më të madh popullor. Sa më shumë rritej mobilizimi popullor, sa më i madh bëhej bashkimi ynë, aq më i tërbuar ishte kundërshtari nga ankthi i humbjes”.
“Sakrifica juaj është kyçi i faktit që përpos kësaj masakre zgjedhore, Partia Demokratike nuk doli më e vogël, më e dobët, por doli më e madhe, më e fortë dhe tanimë më e vendosur për ta çuar deri në fund misionin e saj. Misioni ynë nuk është një mision vetëshërbyes. Ne nuk kemi lindur si një parti për të marrë pushtetin si kundërshtari ynë me çdo kusht e me çdo çmim, e duke shkelur mbi trupat dhe gjakun e shqiptarëve. Ne kemi lindur për të kundërtën, për ta çliruar Shqipërinë nga ky lloj sundimi që lindi përmes terrorit, që lartësoi krimin dhe edhe pas rënies se komunizmit vazhdon të punoj me teorinë e krimit të dobishëm, pra, që për hir të pushtetit t’i mund të bashkëpunosh edhe me kriminelin, edhe me të korruptuarin”, tha ai.
Po ashtu Basha shtoi se “nëse deri më 25 prill detyra jonë kryesore ishte të sillnim ndryshimin, barra që rëndonte në supet tona ishte të sillnim ndryshimin për shqiptarët, 25 prilli na ka rikthyer edhe një herë mbi supe një mision të cilin e kryem dikur, që dimë ta kryejmë, që kemi forcën ta kryejmë dhe që kundërshtari politik i cili mendoi që do na gjunjëzonte më 25 prill e di fare mirë që do mund ta kryejmë përsëri. Dhe ky është misioni i kthimit të legjitimitetit dhe demokracisë në vend. Ky është tani misioni i parë pa të cilin nuk mund të ketë asnjë mekanizëm që të sjellë ndryshimin me votë. Shqiptarët nuk kanë marrë përgjigje për pyetjet që shtroheshin më 25 prill, asnjë zgjidhje nuk ka sjellë 25 prilli për asnjë kategori shoqërore, edhe vetë pakica që mban peng shumicën është sot në dilemën e madhe të administrimit të krimit që ka kryer”./ATSH/
