Një grevë 24-orëshe e shoferëve të metrosë ka paralizuar pjesë të mëdha të rrjetit të transportit në Londër, duke shkaktuar vonesa dhe anulime të shumta gjatë ditës.
Sipas Transport for London, disa linja të London Underground janë plotësisht të mbyllura ose po funksionojnë me shërbim shumë të kufizuar, përfshirë Circle dhe Piccadilly line, ndërsa Metropolitan dhe Central line janë pjesërisht të prekura.
Ndërkohë, Elizabeth line, London Overground dhe Docklands Light Railway po qarkullojnë normalisht, por janë shumë të mbingarkuara për shkak të rritjes së numrit të udhëtarëve. Edhe autobusët po përballen me fluks të madh pasagjerësh.
Greva e parë përfundon sonte në mesnatë, por një tjetër është konfirmuar për ditët në vijim, duke rritur shqetësimet për më shumë ndërprerje në transport. Autoritetet këshillojnë qytetarët të shmangin metro-n kur është e mundur dhe të përdorin alternativa të tjera.
