Një ilaç i ri për humbje peshe, i quajtur retatrutide, po shihet si një nga trajtimet më premtuese kundër obezitetit, sipas rezultateve të hershme të provave klinike.
I zhvilluar nga kompania farmaceutike Eli Lilly, ilaçi jepet si injeksion javor dhe ende nuk është miratuar për përdorim të gjerë. Ndryshe nga trajtimet ekzistuese, ai vepron njëkohësisht në tre hormone që lidhen me oreksin dhe metabolizmin, duke ndihmuar në uljen e ndjeshme të peshës trupore.
Sipas studimeve fillestare, pjesëmarrësit kanë humbur deri në 20–30% të peshës së tyre, një rezultat që në disa raste i afrohet efektit të kirurgjisë për humbje peshe.
Megjithatë, ilaçi mund të shkaktojë efekte anësore si të përziera, të vjella dhe probleme me tretjen. Ai është ende në fazë testimi dhe pritet të kalojë prova të mëtejshme para se të miratohet për përdorim në treg.
