Në Soho të Londrës ka nisur një përplasje mes banorëve dhe bizneseve lidhur me licencat e reja për bare dhe restorante, me shqetësimin se reputacioni i zonës si qendër e jetës së natës po rrezikohet.
Soho Society, një grup banorësh i krijuar në vitin 1972 dhe pjesërisht i financuar nga Këshilli i Westminsterit, ka miratuar një vendim të ri që parashikon kundërshtimin e çdo aplikimi të ri për licenca, si dhe të rinovimeve ekzistuese. Grupi gjithashtu synon të kundërshtojë çdo lokal që kërkon të qëndrojë i hapur pas orës 23:00.
Banorët thonë se Soho po përballet me rritje të zhurmës, krimit dhe mbeturinave për shkak të intensifikimit të jetës së natës dhe fluksit të madh të vizitorëve.
Nga ana tjetër, pronarët e bizneseve paralajmërojnë se këto kufizime mund të dëmtojnë rëndë ekonominë lokale dhe imazhin ndërkombëtar të Soho-s. Rupert Power, pronar i disa lokaleve në zonë, tha se Soho njihet globalisht si qendër krijuese dhe sociale dhe se reputacioni i saj rrezikon të dëmtohet nga kundërshtimet e vazhdueshme. Ai shtoi se qytete si Parisi dhe Nju Jorku kanë një jetë nate më të gjallë se Londra qendrore.
Disa anëtarë të Soho Society kanë ngritur gjithashtu shqetësime se janë ndier të nën presion gjatë votimit për këtë vendim, pasi u është sugjeruar se votat e tyre mund të shihen nga drejtuesit e shoqatës.
Debati pritet të vazhdojë ndërsa autoritetet lokale shqyrtojnë ndikimin e këtyre masave në ekuilibrin mes jetës së banorëve dhe ekonomisë së jetës së natës në zonë.
