Kushtetuesja ishte shumë e qartë kur i tha Kuvendit se vendimin për vlefshmërinë e mandatit parlamentar të Olta Xhaçkës nuk mund ta merrte vetë, por duhet t’ia kalonte trupës së gjykatës për interpretim.
Për ta vonuar sa më shumë procesin, mazhoranca bëri sikur nuk kuptonte. Pavarësisht eksperiencës shumë-vjeçare në jurisprudencë të deputetëve të vet, socialistët kërkuan një ekspert të jashtëm që t’u përkthente vendimin e Gjykatës Kushtetuese. Raporti i tij, që nuk u lexua publikisht në mbledhje, e të cilin A2 CNN e disponon, rrëzon në thelb pengesat që ngritën socialistët për muaj me radhë. Pyetjet e kryetares së komisionit të ligjeve, Klotilda Bushka, nëse nevojitet ndryshimi paraprak i Kushtetutës me pretendimet se neni 70 ka përplasje në dy pika të tij, mori përgjigje negative nga eksperti.
As tentativa tjetër e socialistes Bushka për të mbrojtur ministren e Jashtme, duke ngritur pikëpyetje mbi nenet 66 dhe 66/a të ligjit për funksionimin e Kushtetueses, ku përcaktohen subjektet dhe afatet të cilat vënë në lëvizje Gjykatën nuk u përkrah nga eksperti.
“Ndryshime ose shtesa ligjore në Ligjin për organizimin dhe funksionimin e Gjykatës Kushtetuese, që janë reflektim i drejtpërdrejt i këtyre neneve të Kushtetutës, nuk do të sillnin ndonjë ndryshim në praktikën gjyqësore të Gjykatës Kushtetuese ose, me fjalë të tjera, nuk do të ishin më imponuese për gjykatën se sa vetë nenet e Kushtetutës”.
Opozita pretendon se përfitimet shtetërore të bashkëshortit të Xhaçkës si biznesmen janë në papajtueshmëri me mandatin parlamentar të deputetes. Frika e demokratëve se socialistët mund të gjejnë arsye për të shmangur Gjykatën Kushtetuese, mori përgjigje nga eksperti.
“Vendimi i Gjykatës Kushtetuese është i detyrueshëm dhe Kuvendi duhet të marrë masat ta zbatojë atë, siç ka vepruar edhe më parë kur gjykata është shprehur me vendim”.
Pa shumë mundësi për manovra, socialistët ranë dakord mes tyre që vendimi i Kushtetueses duhet të shqyrtohet sërish në një tjetër këshill i kuvendit.
“Unë mendoj që çështja kalon në pikën zero. Duhet të kalojë në këshillin e mandateve”.
Me forcën e kartonëve, socialistët do ta transferojnë mandatin e Xhaçkës te Këshilli i Mandateve, ku bazuar në afatet dhe procedurat parlamentare, pritet të shqyrtohet në vjeshtën e ardhshme.
